बागलुङ : कोरोना संकटका कारण रोजीरोटी गुमाएकालाई सहयोग गर्न बागलुङ नगरपालिकामा 'फुड बैंक' स्थापना गरिएको छ । देशमा जारी लकडाउनका कारण दैनिक ज्यालादारीमा काम गर्दै आएका श्रमिक मजदुर, गरिब, विपन्नलाई सहयोग गर्न नगरपालिकाले बागलुङ जेसीजको सहयोगमा 'फुड बैंक' स्थापना गरेको हो ।
जेसीजले शुरुवातमा ६० हजार बराबरको खाद्य सामग्री प्रदान गरेर 'फुड बैंक' को स्थापना गरिएको बागलुङ जेसीजका अध्यक्ष सुरेन्द्र शाक्यले बताए । शाक्यका अनुसार, पहिलो चरणमा ५ सय केजी चामल, ७५ केजी दाल, ५० केजी नुन, ५० केजी तेल, २ सय केजी आटा सहयोग गरिएको छ । 'जिल्ला सदरमुकाम र मुख्य बजार क्षेत्र भएकाले बाहिरबाट आएका श्रमिक मजदुरले नपाएको गुनासो छ,' अध्यक्ष शाक्यले भने, 'कसैलाई पनि भोकै बस्ने अवस्था नआओस् भन्ने अभिप्रायले 'फुड बैंक' का लागि जेसीजले पहल र सहकार्य गरेको हो ।'
नगरपालिकाको फुडबैंक स्थापनाकै दिन अधिकारकर्मी राम शर्माले ३० हजार बराबरको २० बोरा चामल र पत्रकार महासंघ बागलुङ शाखाका पूर्व अध्यक्ष तथा ढोरपाटन दैनिकका सम्पादक हरीनारायण गौतमले २० बोरा चामल, दाल र नुन सहयोग गरेका छन् । 'फुड बैंक' मा विभिन्न व्यक्ति, सामाजिक संघ संस्थाले दिएको खाद्य सामग्री नगरपालिकाको स्टोरमा जम्मा गरेर राखिनेछ ।
'फुड बैंक' बाट खासगरी बाहिरबाट श्रम गर्नका लागि आएका श्रमिक मजदुर र तीनका परिवारलाई सहयोग गरिने बागलुङ नगरपालिकाका मेयर जनकराज पौडेलले बताए । 'हामीले नगरपालिकाका सबै वडाका गरिब, विपन्न, मजदुरको पहिचान गरेर पहिलो चरणमा राहत बाँडिसकेका छौ,' मेयर पौडेलले भने, 'फुड बैंक' बैंकबाट थप समस्यामा परेका र विशेष गरी बाहिरबाट आएर लकडाउनका कारण अलपत्र श्रमिक मजदुरलाई तत्काल सहयोग गर्नेछौं।' नगरपालिकाले कोरोना रोकथाम तथा व्यवस्थापनका लागि ३० लाखको कोष समेत बनाएको छ ।
प्रतिक्रिया दिनुहोस !
