क्वारेन्टाइनबाट छुट्नेको गुनासो : लक डाउन नियम कसैलाई काखा, कसैलाई पाखा
चैत ३०, २०७६ आइतबार १६:२६:०
जोमसोम : विश्वव्यापी माहामारीको रूपमा फैलिएको नोवल कोरोना भाइरस ( कोभिड–१९ ) रोकथाम तथा नियन्त्रण गर्न सरकारले चैत्र ११ गतेदेखि मुलुक लक डाउन गर्यो । लक डाउनको समयमा अतिआवश्यकीय सेवाबाहेक सबै निकाय ठप्प पार्न सरकारले निर्देशन गर्यो ।
सरकारले गरेको पहिलो चरणको लक डाउनको समयमा पोखरादेखि म्याग्दी हुँदै गत चैत्र १६ गते मुस्ताङको घासा आइपुगेका ४ जना उपल्लो मुस्ताङी र अन्य ३ जना रोल्पा र बाग्लुङका मालबाहक ट्रकका चालक र सहचालकलाई स्थानीय प्रशासनले क्वारेन्टाइनमा राख्यो । लक डाउनका बेला जिल्लामा कोरोना भाइरसको संक्रमण जोखिम फैलिन सक्ने भन्दै उनीहरूलाई त्यहाको क्वारेन्टाइन व्यवस्थापन समितिले १४ दिनसम्म क्वारेन्टाइनमा राखेर स्वास्थ्य निगरानी गरायो ।
मुस्ताङको थासाङ–४ घासा स्थित जनता आधारभूत विद्यालयको क्वारेन्टाइनमा १४ दिन पट्यारिलो तरिकाले बिताए। घिलिङका स्थानीय टसी गुरुङसहित ७ जनाको टोली क्वारेन्टाइन बसेका थिए । उनीहरूले त्यहाँ क्वारेन्टाइन पामदण्ड पूरा गरी आइतबार बाहिरिएका छन् । क्वारेन्टाइनमा बसेका उनीहरूलाई थासाङ–४ का वडाध्यक्ष विशाल शेरचनको उपस्थितिमा एक बिदाइ कार्यक्रम गरी जिल्ला स्वास्थ्य कार्यालय मुस्ताङका ल्याब असिस्टेन अमित बस्यालले कोरोना नभएको निरोगिताको प्रमाणपत्र हस्तान्तर गरे ।
मुस्ताङको घासा क्वारेन्टाइनमा १४ दिन बिताएका घिलिङका स्थानीय टसी गुरुङले लक डाउनमा जिल्ला आउजाउ गर्ने सबैलाई समान नियम लागु नभएको दुखेसो सुनाए । उनले भने, ‘हामीलाई कोरोना संक्रमण छैन भन्नेमा ढुक्क थियौँ । सरकार निर्णय र सरोकारवालाको आग्रहलाई स्वीकार गर्यौं । तर ठूलाबडा व्यक्तिलाई लक डाउनले छेकेन ।’ उनले आफू बसेको क्वारेन्टाइन अगाडिको बाटो सवारी आउजाउ गर्ने क्रमले हामीलाई खिन्न बनाएको बताए ।
आफूहरू क्वारेन्टाइनमा बस्दा कुनै पछुतो नभएको र यहाँको स्वास्थ्य परीक्षणले निर्धक्क घर फर्किने वातावरण बनेको उनले जानकारी दिए । क्वारेन्टाइनमा बस्दा खाना र बस्नको राम्रो सुविधा र नियमित स्वास्थ्य परीक्षण भएको बताए । तर क्वारेन्टाइनमा बस्दा इन्टरनेट र श्रब्यदृष्य हेर्ने सुविधा नहुँदा दिन काट्न गाह्रो परेको गुरुङले सुनाए ।
क्वारेन्टाइनमा बस्ने ७ जनाको रिपोर्ट नेगेटिभ
मुस्ताङको थासाङ–४ घासा क्वारेन्टाइनमा १४ दिन बिताएका व्यक्तिहरूको रिपोर्ट नेगेटिभ आएको जिल्ला स्वास्थ्य कार्यालय मुस्ताङले जनाएको छ । मुस्ताङको लोघेकर दामोदरकुण्ड–३ बस्ने ४ जना र बाग्लुङ र रोल्पा बस्ने ३ जना ट्रकका चालक र सहचालकको शनिबार द्रुत परीक्षण ( र्यापिड डाईगोनोस्टिक टेष्ट ) गरिएको थियो ।
कोरोना परीक्षण गर्ने यन्त्र किटको सहयोगमा गरिएको र्यापिड टेष्ट गर्दा उनीहरूको रिपोर्ट नेगेटिभ आएको ल्याब असिस्टेन अमित बस्यालले जानकारी दिए । स्वास्थ्य मन्त्रालयले हिमाली जिल्ला मुस्ताङलाई पनि हालै केही थान आरबिटि कोरोना परीक्षण किट पठाएको जिल्ला स्वास्थ्य प्रमुख टिकारामले बताए ।
प्रतिक्रिया दिनुहोस !
