भैरहवा : भारतमा कोरोना संक्रमण बढ्दै गएपछि यहाँको सीमा नाकामा उच्च सतर्कता अपनाइएको छ ।भारतसँग जोडिएको रुपन्देहीको सीमामाबाट आवतजावत हुन सक्ने विषयलाई मध्यनजर गर्दै स्थायी रुपमा सशस्त्र प्रहरी खटाएर २४ घण्टा निगरानी थालिएको छ । आवतजावत हुने सबै नाकादेखि लिएर आउन सक्ने झाडी खोल्सासम्म सबैतिर सशस्त्र प्रहरी परिचालन गरिएको छ ।
यसको अलवा नेपाल प्रहरीले पनि सीमामा निगरानी गर्नुका साथै आसपासका क्षेत्रहरुमा लकडाउनमा कडाई गरेको छ । सशस्त्र प्रहरी बल नेपाल नम्बर २७ गण रुपन्देहीका प्रमुख एसपी तेज पोखरेलले भारतसँग जोडिएको ६० किलोमिटर सीमामा जनशक्ति खटाएर निगरानी भइरहेको बताए ।
उनका अनुसार रुपन्देहीको पश्चिमतर्फ कोठी नदीदेखि पूर्वतर्फको बरवा खोलासम्म भारतसँग जोडिएको सीमामा सशस्त्र प्रहरीका जवान खटिएका छन् । एक जवानले अर्को जवानलाई देख्ने गरी सीमामा सशस्त्र प्रहरीलाई खटाइएको छ ।
सीमामा ५२ वटा स्थायी प्वाइन्ट राखेर सीमाको निगरानी भइरहेको एसपी पोखरेलले बताए । यस अघि ५ वटा युनिट रहेको सीमामा १० वटा युनिट थप गरिएको छ । जवानहरु सीमामा खटिएसँगै सशस्त्र र नेपाल प्रहरीका उच्च अधिकारीह भने दिनहुँ सीमाको अवस्थाबारे बुझ्न सीमा क्षेत्रको अनुगमन गर्ने गरेका छन् ।
सीमा सुरक्षाका लागि पाल टाँगेर खटिएका सशस्त्र प्रहरीलाई भने उचित व्यवस्थापन छैन । सीमा फोहोर रहेकोले मच्छरको बिगबिगी छ । डेंगु संक्रमणको समेत जोखिम रहेको बेला उनीहरु दिनरात सीमामा मच्छरका बीच खटिएका छन् ।
'जति मच्छर लागेपनि सीमाको सुरक्षा गर्ने हाम्रो दायित्व भएकोले खट्नु पर्र्यो,' नाम उल्लेख नगरिदिन आग्रहमा एक जवानले भने, 'हामी कसरी खटेका छौँ, त्यो पीडा हामी बाहेक अरुले कहाँ बुझ्न सक्छन् र ?'
भारतसँग रुपन्देहीको ७ वटा स्थानीय तहका सीमा जोडिएका छन् । तर, सीमा सुरक्षाका लागि खटेका सुरक्षाकर्मीहरुको उचित व्यवस्थापनको लागि भने उनीहरुले कुनै सहयोग गरेका छैनन् ।
प्रतिक्रिया दिनुहोस !
