शुभलक्ष्मी विश्वकर्मा । हेटौंडा : पछिल्लोपटक भारतलगायत विभिन्न मुलुकबाट चार सय ७१ जना मकवानपुर भित्रिएको पाइएको छ । विदेशबाट फर्किएका सबैको पहिचान गरेर घरमै रहे पनि उनीहरुलाई कोरोना भाइरसको चेकजाँच भने गरिएको छैन ।
जसमध्ये सरकारले निर्माण गरेको क्वारेन्टाइनमा एकजना छन् भने चार सय ७० जना होम क्वारेन्टाइनमा छन् । प्रदेश सरकारले हेटौंडाको कर्रास्थित विद्यालय भवनमा निर्माण गरेको आइसोलेसनमा तीनजना छन् । आइसोलेसनमा बस्नेलाई पाँच समय खाना, खाजा र नेटको सुविधा उपलब्ध गराउनुका साथै व्यक्तिगत सरसफाईका साधन सुविधास्वरुप दिइएको बागमती प्रदेश सरकार सामाजिक विकास मन्त्रालयका प्रवक्ता दिपेन्द्र सुवेदीले जानकारी दिए । उनका अनुसार हालसम्म मकवानपुरका २५ जनाको स्वाब परीक्षण गरिएकोमा २० जनाको रिपोर्ट नेगेटिभ आएको छ भने अन्य पाँचजनाको रिपोर्ट आउन बाँकी छ ।
कोरोना भाइरसको जोखिम कम गर्न सरकारले लकडाउन गरेसँगै स्थानीय तहमा बाहिरबाट आउनेको लगत संकलन सुरु गरिएको थियो । जिल्लाका सबै स्थानीय तहमा गरी ४ सय ७१ जना विदेशबाट आउनेको पहिचान भएको पाइएको छ । पहिचान भएकालाई स्थानीय सरकारका वडाध्यक्ष, प्रमुख, उपप्रमुखलगायत जनप्रतिनिधिले सेल्फ क्वारेन्टाइन र स्थानीय सरकारले तयार पारेका क्वारेन्टाइनमा बस्न अनुरोध गरेका हुन् ।
यस क्रममा एकजना मात्र सरकारले तयार पारेको क्वारेन्टाइनमा बस्न तयार भएका हुन् । अन्य ४७० जना भने घरमै सुरक्षित तरिकाले बसेको स्थानीय जनप्रतिनिधिले बताए ।
प्रतिक्रिया दिनुहोस !
