नुवाकोट : सरकारले कोरोना महामारीको रोकथामका लागि चैत ११ गतेदेखि देशव्यापी लकडाउन गरेपछि नुवाकोटमा विदेशबाट आएका ४ सय ५२ जनाको पहिचान भएको छ ।
विभिन्न स्थानमा खडा गरिएका सरकारी क्वारेन्टाइनमा एक महिलासहित १४ जना बसिरहेका छन् भने तीन सय ३० जना होम क्वारेन्टाइनमा बसिरहेको जिल्ला प्रहरी कार्यालय नुवाकोटले जनाएको छ । विदेशवाट आएकामध्ये अधिकांशको १५ दिन समय कटेको जिल्ला प्रहरी प्रमुख तथा प्रहरी उपरीक्षक अविनारायण काफ्लेले वताए ।
त्रिशूली र खरानीटारका क्वारेन्टाइनमा मात्र मानिस रहेको काफ्लेले बताए । नुवाकोट जिल्ला अस्पताल त्रिशूलीमा १०, खरानीटार स्वास्थ्य केन्द्रमा ६ र ककनी स्वास्थ्य केन्द्रमा २ वटा आइसोलेसन निर्माण गरिए पनि सबै रित्तै छन् । तीन साताको अवधिमा नुवाकोटवाट दुई जनाको स्वाब र एक जनालाई काठमाडौं नै पठाएर परीक्षण गरिएकोमा तीनै जनाको रिपोर्ट नेगेटिभ आएको जिल्ला स्वास्थ्य कार्यालय नुवाकोटले जनाएको छ । कोरोनाको लक्षण देखिएको कोही पनि बिरामी पाँच दिनदेखि अस्पतालमा पुगेका छैनन् ।
नुवाकोटका १२ स्थानीय तहमा क्वारेन्टाइनका लागि दुई साता अगाडि नै दुई सय ७९ वटा शैया तयार पारिएका थिए । ११ वटा क्वारेन्टाइन स्थल विद्यालयमा छन् । तिनमा एक सय ४ शैया राखिएका छन् । जिल्ला प्रशासन कार्यालय नुवाकोटका अनुसार सबैभन्दा धेरै बेलकोटगढी नगरपालिकाले ७३ शैया तयार पारेको छ ।
त्यहाँ चार विद्यालयमा क्वारेन्टाइन राखिए पनि हालसम्म कोही बस्नुपरेको छैन ।
प्रशासनका अनुसार विदुर नगरपालिकामा ४४ शैयाका क्वारेन्टाइन छन् । शैक्षिक तालिम केन्द्र भवन त्रिशूलीस्थित क्वारेन्टाइनमा १३ जना क्वारेन्टाइनमा बसेका छन् । दक्षिणी भेगमा रहेको तारकेश्वर गाउँपालिकाले क्वारेन्टाइनका लागि १९ शैया तयार राखेको छ । त्यहाँ एउटा क्वारेन्टाइन विद्यालयमा छ भने अरू स्वास्थ्य संस्थामा छ । उक्त गाउँपालिकामा भारतबाट फर्किएका एक सय ५५ जना होम क्वारेन्टाइनमा छन् ।
तारकेश्वरका एकजना शंकास्पद युवकलाई गतसाता त्रिशूली अस्पतालको आइसोलेसन पठाइएकोमा परीक्षण गर्दा रिपोर्ट नेगेटिभ आएको छ । नुवाकोटबाट बाहिरबाट भित्रिएका र संक्रमणको आशंका भएका अधिकांशको चाहना घरमै बस्ने रहेकोमा उनीहरुले १५ दिन बिताइसकेका छन् ।
नुवाकोटका प्रमुख जिल्ला अधिकारी द्रोण पोखरेलले त्रिशूलीस्थित तालिम केन्द्रको क्वारेन्टाइनमा पतिपत्नीसहित १३ जना बसिरहेको बताए । महिलाका लागि छुट्याइएको त्रिशूली क्लिनिक जनसेवा अस्पतालको क्वारेन्टाइन पनि रित्तै छ । फागुन ३० देखि लकडाउनसम्ममा जिल्लामा ४ सय ५२ जना भित्रिएको नुवाकोट प्रहरीसँग तथ्यांक छ । ‘क्वारेन्टाइनमा नबसे पनि कोरोना भाइरसको जोखिम न्यूनीकरण गर्न स्वास्थ्यकर्मीसहित ८८ वटै वडामार्फत निगरानी गरेका छौं’, प्रजिअ पोखरेलले भने ।
प्रतिक्रिया दिनुहोस !
