बाजुरा : बाजुराको स्वामिकार्तिक गाउँपालिकाको साप्पाटाबाट जीवन मरणको दोसाँधमा रहेकी सुत्केरीको हेलिकोप्टरबाट उद्धार गरिएको छ ।स्वामिकार्तिक गाउँपालिका १ साप्पाटा बस्ने ३५ वर्षीया सुपारी विकलाई हेलिकोप्टरमार्फत उद्धार गरिएको प्रमुख जिल्ला अधिकारी गंगा प्रसाद न्यौपानेले बताए।
सोमबार बिहानै उद्धार गरिएको गाउँपालिका अध्यक्ष चिरिञ्जीवि शाहीले बताए। सुत्केरीलाई हेलिकोप्टरमार्फत नेपालगञ्ज लगिएको छ । आइतबार बिहान ४ बजे घरमै बच्चा जन्माएकी सुपारीको सालनाल आएको छैन। उनको पेटमा अर्को बच्चा हुनसक्ने स्वास्थ्यकर्मीले बताएका छन् ।
साप्पाटा स्वास्थ्यचौकी इन्चार्ज बिर्ज विकले भने उनको अवस्था निकै जटिल रहेको बताए । उनको सालनाला पेटमै अड्किएको छ, अर्को बच्चा पनि हुन सक्ने बिकले बताए । स्वामिकार्तिक गाउँपालिकामा अल्ट्रासाउन्डको सुविधा छैन।उनले मृत शिशुलाई जन्म दिएकी थिइन।उनका श्रीमान भारतमा छन् । उनी पनि लकडाउनले अलपत्र रहेको आफन्तले बताएका छन्।
स्वामिकार्तिक गाउँपालिका १ मुक्तिकोट बाजुराको दुर्गम गाउँ हो।यो गाउँ पुग्न सदरमुकाम मार्तडीबाट तीन दिन पैदल लाग्छ। यो आर्थिक वर्षमा मात्र बाजुरामा अत्याधिक रक्तस्रावका कारणले पाँचजना सुत्केरीको मृत्यु भइसकेको छ।
प्रतिक्रिया दिनुहोस !
