राजविराज : सप्तरीमा पहिलो पटक र्यापिड डाइग्नोस्टिक किटमार्फत गरिएको ३८ जनाको कोरोना परीक्षणको नतिजा नेगेटिभ आएको छ । अग्नीसाइर कृष्णसवरण गाउँपालिकामा १८ जना, कञ्चनरुप नगरपालिकामा १६ जना र राजविराज नगरपालिकामा चार जनाको परीक्षण गरिएकोमा सबैको रिपोर्ट नेगेटिभ आएको स्वास्थ्य कार्यालय, सप्तरीले जनाएको छ ।
चार वटा टोली बनाइ सोमबारदेखि विभिन्न क्वारेन्टाइनमा परीक्षणका लागि आठ जना स्वास्थ्यकर्मीलाई खटाइएको छ । हाल सप्तरीको विभिन्न ३२ वटा क्वारेन्टाइनमा पाँच महिलासहित दुई सय २० जना छन् । यो अवधिमा क्वारेन्टाइनबाट घर फर्किसकेका दुई सय ३८ जनाको समेत सम्बन्धित स्थानीय तहमै स्वास्थ्यकर्मीको टोली पुगेर परीक्षण गर्ने स्वास्थ्य कार्यालयका निमित्त प्रमुख दुनियालाल यादवले बताए ।
निमित्त प्रमुख यादवका अनुसार १४ दिन पुगेपछि क्वारेन्टाइनमा निगरानीमा बसेका व्यक्तिहरुको परीक्षण गरिने छ । १४ दिन क्वारेन्टाइनमा बसेका उनीहरूलाई थप सात दिन क्वारेन्टाइनमा राखेर पुनः परीक्षणपश्चात घर पठाइने छ । परीक्षण गर्दा रिपोर्ट पोजेटिभ आएमा बिरामीलाई आइसोलेशनमा राखी पीसीआर प्रविधिबाट देखापर्ने नतिजासँग दाँज्न धरान पठाइने छ ।
सरकारले ‘र्यापिड टेस्ट’ विधिबाट क्वारेन्टाइनमा रहेका व्यक्तिको कोरोनाभाइरस जाँच गर्ने निर्णय गरेसँगै आइतबार सप्तरीलाई आठ सय ६० किट उपलब्ध गराएको छ । गजेन्द्रनारायण सिंह अस्पताल राजविराजलाई एक सय ६०, स्वास्थ्य कार्यालय सप्तरीलाई ६ सय र कञ्चनरुप स्वास्थ्य चौकीलाई एक सय थान किट उपलब्ध भएको स्वास्थ्य कार्यालय सप्तरीले जनाएको छ । किट उपलब्ध हुना साथ परीक्षण सुरु गरिएको जनाउँदै अस्पतालका प्रमुख मेडिकल सुपरिटेन्डेन्ट डा. चुमनलाल दासले मलेरियाको परीक्षण पनि सँगै गरिने बताए ।
अस्पतालका प्रमुख मेसु डा. दासले क्वारेन्टाइनहरूमा रहेका र ‘फिभर क्लिनिक’ मा जचाउँन आएका व्यक्तिलाई उच्च प्राथमिकतामा राखेर यो विधिबाट परीक्षण सुरु भएपछि रिपोर्ट छिटो आइ उपचार सहज हुने विश्वास व्यक्त गरे ।
प्रतिक्रिया दिनुहोस !
