भक्तपुर : राष्ट्रिय एचआईभी तथा एड्स महासंघ नेपाल (एनएपीएन) ले एचआईभी संक्रमित १२ वर्षमुनिका बालबालिकालाई दुईमहिनाको लागि राहतस्वरुप खाद्यान्न तथा पोषण वितरण गर्ने भएको छ । जीवनदायिनी एन्टिरेट्रोभाइरल (एआरभी) औषधि खाइरहेका देशभरका ६ सय ६८ बालबालिकालाई उक्त राहत वितरण गरिने एनएपीएनका अध्यक्ष राजेश दिदियाले जानकारी दिए ।
उनका अनुसार राहतमा ती बालबालिकालाई प्रतिमहिना आठ किलो चामल, एक किलो दाल, एक किलो गेडागुडी, १० वटा अन्डा, एक किलो गहुँको पीठो, एककिलो चिनी, दूध दुई लिटर, फलफूल एक किलो र खाने तेल एक लिटर वितरण गरिनेछ । उक्त राहतसँगै यातायात खर्चवापत ८० रुपैयाँसमेत प्रदान गरिने उनको भनाइ थियो ।
'कोरोना भाइरस संक्रमणका दृष्टिले एचआईभी संक्रमित बालबालिका बढी जोखिममा छन्,' अध्यक्ष दिदियाले भने, 'तर उनीहरु सरकारी राहतभन्दा बाहिर रहेकाले एनएपीएनले पहल गरेको हो ।'
उनका अनुसार एचआईभी संक्रमित ४५ वर्षमाथिका ७ सय ३२ जनालाई पनि बालबालिकासरह दुई महिनाको लागि राहतस्वरुप खाद्यान्न तथा पोषण सहयोग गरिने भएको छ । अभिभावक गुमाएका अति गरिब तथा विपन्न १२ वर्षमुनिका बालबालिका र ४५ वर्षमाथिका संक्रमितहरुलाई मात्रै खाद्यान्न तथा पोषण उपलब्ध गराइने अध्यक्ष दिदियाले स्पष्ट पारे । उनका अनुसार देशभर रहेका एनएपीएनमा आवद्ध ५९ वटा समुदायमा आधारित गैरसरकारी संघसंस्थाले बालबालिकालगायतलाई उक्त राहत वितरण गर्नेछन् ।
दुई महिना दिइने उक्त राहतको लागि नेपालस्थित सेभ द चिल्ड्रेनले आर्थिक सहयोग गरेको उनले जानकारी दिए । एनएपीएनका अनुसार नेपालमा १६ वर्षमुनिका एकहजार तीनसय ४५ जना बालबालिका एचआईभी संक्रमित रहेका छन् । जसमा सात सय ३० बालक र ६ सय १५ बालिका रहेका छन् । उनीहरुमा पनि एक अभिभावक गुमाएका बालबालिकाको संख्या पाँचसय पचास रहेको अध्यक्ष दिदियाले जानकारी दिए । उनका अनुसार एकसय ९१ बालबालिकाका दुवै अभिभावक छैनन् ।
एनएपीएनको तथ्यांकअनुसार सुदूर पश्चिममा सबैभन्दा बढी एचआईभी संक्रमित बालबालिका रहेका छन् । संस्थाको २०२० जनवरीसम्मको तथ्यांकअनुसार सुदूर पश्चिममा तीनसय दस बालबालिका एचआईभी संक्रमित छन् । त्यस्तै प्रदेश ५ मा दुई सय ९२, बागमती प्रदेशमा दुई सय ७४, प्रदेश २ मा एकसय ७२, गण्डकी प्रदेशमा एकसय ४८, प्रदेश १ मा ९७ र सबैभन्दा कम कर्णाली प्रदेशमा ५२ जना एचआईभी संक्रमित बालबालिका छन् ।
सरकारले ग्लोबल फण्डमार्फत एचआईभी संक्रमित बालबालिकालाई प्रत्येक महिना एकएक हजार रुपैयाँसमेत उपलब्ध गराउँदै आएको छ ।एनएपीएनले घरदैलो गरी कोरोना भाइरस संक्रमण नियन्त्रण तथा व्यवस्थापन गर्न सरकारले गरेको लकडाउनको समयमा घरदैलोमार्फत देशभरका एचआईभी संक्रमितको हातहातमा एआरभी औषधि पु¥याउँदै आएको छ ।
अध्यक्ष दिदियाका अनुसार ७६ जिल्लामा रहेको संस्थाको सञ्जालले औषधि अभाव भएका एक हजार दुईसयभन्दा बढी संक्रमितलाई हातहातमा एआरभी औषधि पुर्याइएको हो ।
नेपालमा ३२ हजार सात सय ३५ जना एचआईभी एड्स संक्रमित रहेको अनुमान गरिएको छ । जसमा पुरुष २० हजार दुई सय ९४ र महिला १२ हजार पाँच सय ६१ जना रहेका छन् ।
एचआईभी संक्रमित बालबालिका
क्र.सं प्रदेश बालक बालिका जम्मा
१ १ ५६ ४१ ९७
२ २ ९९ ७३ १७२
३ बागमती १३४ १४० २७४
४ गण्डकी ७१ ७७ १४८
५ ५ १७७ ११५ २९२
६ कर्णाली २९ २३ ५२
७ सुदूर पश्चिम १६४ १४६ ३१०
प्रतिक्रिया दिनुहोस !
