कालिकोट : जिल्लामा कोरोना भाइरसको महामारी रोक्न भारतबाट आएका नागरिकको स्वास्थ्य परीक्षण गर्न डाक्टर सहितको स्वास्थ्यकर्मीको टोली गाउँ गएको छ । स्वास्थ्य सेवा कार्यालय कालिकोटको नेतृत्वमा जिल्ला अस्पतालमा कार्यरत डाक्टरसहितको स्वास्थ्यकर्मीको टोली भारतबाट फर्किएका नागरिकको स्वास्थ्य परीक्षण गर्न गाउँ गएको हो ।
स्वास्थ्य सेवा कार्यालय कालिकोटका जनस्वास्थ्य अधिकृत तथा सूचना अधिकारी कटकबहादुर महतले जिल्लाभरी भारतबाट फर्किएका हरेक व्यक्तिको स्वास्थ्य परीक्षण गर्न टोली गाउँमा खटिएको जानकारी दिए ।
उनका अनुसार जिल्लाका ९ वटै स्थानीय तहमा झण्डै ४ सय नागरिक तत्कालिन अवस्थामा भारतबाट गाउँ फर्किएका छन् । पछिल्लो समय भारतबाट फर्किएका नागरिकमा धमाधम कोरोनाको संक्रमण देखिन थालेपछि जिल्लामा सबै नागरिकहरुको स्वास्थ्य परीक्षण गर्न स्वास्थ्यकर्मीको टोली गाउँ गएको हो ।
जिल्ला अस्पतालमा कार्यरत डा. विज्ञान प्रजापतिको नेतृत्वमा गएको टोलीले सोमबार र मंगलबार जिल्लाको खाँडाचक्र नगरपालिकामा १४ जना र शुभकालिका गाउँपालिकाका ११ जना गरी २५ जनाको र्यापिड डाइगनोसिस टेष्ट गरेको छ । जसमा सबैको रिपार्ट नेगेटिभ आएको छ ।
गाउँमा पछिल्लो समय हुलका हुल मान्छे भारतबाट लुकेर आएका छन् । सरकारले लकडाउन गरेपछि यहाँका मान्छेहरुले पहिले पैदल हिड्ने बाटोको प्रयोग गरी गाउँ फर्किएकाले गाउँमा कोरोनाको त्रास बढी छ । सूचना अधिकारी महले भने, 'हामी गाउँमा भारतबाट फर्किएका हरेक व्यक्तिको आरडिटी परीक्षण गर्छौँ । गाउँमा एक सय दशमलव ४ डिग्री ज्वरो आएका व्यक्तिको स्वाब पनि संकलन गर्छौं। आरडिटी जाँचमा पोजेटिभ दिएपछि उनीहरुको पनि स्वाब संकलन गर्छौँ ।
उनका अनुसार जिल्लाका ९ वटा स्थानीय तहमा बनाइएका क्वारेन्टाइनमा २२ जना छन् । हालसम्म १ सय ९४ जना व्यक्तिलाई १४ दिनसम्म क्वारेन्टाइनमा राखेर घर पठाइएको छ । जिल्लाका ९ वटै स्थानीय तहमा ४ सय ४४ बेडको क्वारेन्टाइनको व्यवस्था गरेका छन् । अधिकांश क्वारेन्टाइनहरु खाली छन् ।
प्रमुख जिल्ला अधिकारी कृष्णचन्दै पौडेलले जिल्लामा हालसम्म कुनै पनि व्यक्तिमा कोरोना भाइरसका लक्षण मिल्ने बिरामी नरहेको बताए । उनले भने,' जिल्ला अस्पतालका डाक्टरसहितको स्वास्थ्यकर्मीको टोली आरडिटी जाँचका लागि गाउँमा खटिएको छ ।
जिल्लामा स्थानीय सरकार बाहिरबाट आउने व्यक्तिलाई क्वारेन्टाइनमा राख्ने र घर पठाइएका व्यक्तिको पनि निगरानी राख्ने गरेका छन् । जिल्लाबाट जम्मा ९ वटाको स्बाव संकलन गरी पठाएकोमा सबैको रिपोर्ट नेगेटिभ आएको छ । अहिलेसम्म जिल्ला सामान्य छ । लकडाउनको पालना गर्नृका लागि प्रशासनले कडाइ गरेको छ । जिल्लामा मानवीय चहलपहल ठप्प छ ।
प्रतिक्रिया दिनुहोस !
