काठमाडौं : काठमाडौंमा थप दुईजनामा कोरोना पुष्टि भएको छ।स्वास्थ तथा जनसंख्या मन्त्रालयले मंगलबार एकै परिवारका दुईजनामा कोरोना पुष्टि गरेको हो।काठमाडौंमा कोरोना संक्रमितको संख्या ३ पुगेको छ।
कागेश्वरी मनोहरा नगरपालिका ९ पेप्सीकोला टाउन प्लानिङस्थित सनसिटी अपार्टमेन्टमा बस्ने एकै परिवारका दुईजनामा कोरोना संक्रमण देखिएको हो। आरडीटी परीक्षणबाट एकै परिवारका तीनजनामा कोरोना संक्रमण देखिएपछि पुन: परीक्षण गर्दा दुईजनामा पोजेटिभ देखिएको मन्त्रालले पुष्टि गरेको छ।एकजनाको भने कोरोना नदेखिएको मन्त्रालयले जनाएको छ।
संक्रमित हुनेमा ५८ वर्षीय पुरुष र ८१ वर्षीया महिला रहेको स्वास्थ्य मन्त्रालयले जनाएको छ। अपार्टमेन्टमा बस्ने सबैजनाको कोरोना परीक्षण गरिने स्वास्थ्य तथा जनसंख्या मन्त्रालयले जनाएको छ।अपार्टमेन्टमा कोरोना पुष्टि भएपछि त्यहाँ बस्ने सबैजनाको परीक्षण सुरु गरिएको छ।
त्यस्तै संक्रमित व्यक्तिको सम्पर्कमा आएकाहरुको ट्रेसिङ पनि सुरु गरिएको मन्त्रालयले फेसबुकमार्फत जानकारी दिएको छ । संक्रमित दुवैजना चैत्र ५ गते बेलायतबाट काठमाडौं आएका थिए।तीनैजनाको पाटन अस्पतालमा उपचार भइरहेको छ। उनीहरुको स्वास्थ्य अवस्था सामान्य रहेको छ।
यस्तै नेपालमा कोरोना संक्रमितको संख्या १६ पुगेको छ। काठमाडौंमा ३, बागलुङमा २, रौतहटमा १, वीरगन्जमा ३, कैलालीमा ५, धादिङमा १ गरी १५ जनाको विभिन्न अस्पतालमा उपचार भइरहेको छ। एकजना भने संचो भएर घर फर्किसकेका छन्।संक्रमित सबैको स्वास्थ्य अवस्था सामान्य रहेको सम्बन्धित अस्पतालले जनाएका छन्।
प्रतिक्रिया दिनुहोस !
