दमौली : तनहुँमा हालसम्म कोरोनाको आशंकामा परीक्षण गरिएका सबैको रगत परीक्षण नतिजा नेगेटिभ आएको छ । स्वास्थ्य कार्यालय तनहुँका अनुसार कोरोनाको संक्रमण देशमा देखिए यता जिल्लाभर गरिएका र्यापिड तथा स्वाब परीक्षण कुनैमा पनि संक्रमण भेटिएको छैन । जिल्लाबाट हालसम्म १२ जनाको स्वाब संकलन गरेर पोखरास्थित क्षेत्रीय प्रयोगशाला पठाइएको थियो । यसका अलावा एक जनाले आफैं गएर पोखरामा नमूना दिएका थिए ।
सरकारले विदेशबाट आएका तथा संदिग्धसँग सम्पर्कमा रहेकाको द्रुत गतिमा परीक्षण गर्न थालेयता जिल्लाका स्थानीय तहका स्वास्थ्य एकाईमार्फत पनि परीक्षण थालिएको छ । यस्तो र्यापिड टेष्टका क्रममा हालसम्म १० वटा तहले तीन सय ५८ जनाको नमूना परीक्षण गरेका छन् ।
१४ दिनअघि विदेशबाट आएका तीन सय ११ पुरुष तथा ४७ महिलाको नमूना परीक्षण गरिएकामा कसैको पनि पोजिटिभ नतिजा नआएको स्वास्थ्य कार्यालय प्रमुख शंकरबाबु अधिकारीले बताए । यो परीक्षण अझै केही दिन चल्ने बताइएको छ । प्रदेश सरकारमार्फत आएको ६ सय ४० र्यापिड परीक्षण किट स्थानीय तहमा वितरण भएको छ । स्थानीय तहका अस्पताल तथा स्वास्थ्य एकाईमा यस्ता व्यक्तिको नमूना परीक्षण गरिएको अधिकारीले बताए ।
‘आवश्यकताका आधारमा अरुको पनि परीक्षण गर्नेछौं,’ उनले भने । बन्दीपुर गाउँपालिकाका अध्यक्ष पूर्णसिं थापाले बन्दीपुर अस्पतालमा पनि परीक्षणको व्यवस्था गरिएको बताए । उनका अनुसार बन्दीपुरमा १५ जनाको परीक्षण गरिएको थियो । जिल्लामा सबैभन्दा धेरै भीमाद नगरपालिकामा ७२ जनाको परीक्षण गरिएको छ । सबैभन्दा कम आँबुखैरेनी गाउँपालिकामा ११ जनाको नमूना परीक्षण गरिएको छ ।
प्रतिक्रिया दिनुहोस !
