डडेल्धुरा : डडेल्धुराबाट धनगढीतर्फ गइरहेको से १ च २३८८ नम्बरको कार भीमदत्त राजमार्ग अन्तरगत डोटीको जोरायल गाउँपालिका १ घण्टेश्वरको घोरेडीमा दुर्घटना हुँदा ६ जना घाइते भएका छन्।
बुधबार डडेल्धुरादेखि धनगढीतर्फ गइरहेको से १ च २३८८ नम्बरको कार दुर्घटनामा परेको घण्टेश्वर प्रहरी चौकी गैराका प्रहरी हवल्दार शम्भुसिं धामीले जानकारी दिए।
कार सडकदेखि झण्डै तीन सय मिटर तल खसेको जनाइएको छ । प्रहरीका अनुसार कारमा सवार चालक सहित ६ जना सबै घाइते भएका छन्।
चालक मानबहादुर थापाको खुट्टाको रड निकाल्न धनगढी गइरहेको कारमा चालकसहित ४ जनाको जिल्ला प्रशासन कार्यालय डडेल्धुराबाट सवारी पास दिइएको पाइएको प्रहरीले जनाएको छ। कारमा दुई साना बालबालिका सवार रहेको र दुई जनाको सवारी पास नखुलाइएको प्रहरीले जानकारी दियो ।
घटनामा परी घाइते हुनेमा चालक मानबहादुर थापासहित डडेल्धुराकै रामचन्द्र अवस्थी, रतन भण्डारी, आरनबहादुर थापा, एलिजा थापा र मान्धरी थापा रहेको जनाइएको छ।
प्रहरीका अनुसार एलिजा र मान्धरीको अवस्था गम्भीर रहेको छ। उनीहरूको उद्दार गरी पद्मा अस्पताल कैलालीमा उपचारका लागि पठाउने तयारी भइरहेको छ। दुर्घटनाको कारण भने खुलेको छैन ।
प्रतिक्रिया दिनुहोस !
