लकडाउनले रोकिए महाकालीपारि : घरमा आमाको मृत्यु, भारतीय क्वारेन्टाइनमै किरिया
वैशाख ४, २०७७ बिहीबार १३:४:०
दार्चुला : जिल्लाको शैल्यशिखर नगरपालिकास्थित जोगेडाका ३५ वर्षीय बासुदेब भट्ट विगत तीन-चार वर्षदेखि भारत पिथौरागढमा काम गर्थे । घरको आर्थिक अवस्था निकै कमजोर भएको कारण अतिरिक्त आयको लागि ओभरटाइम गर्थे । तर कोरोनाभाइरस प्रकोप सुरुपछि उनको काम अवरुद्ध भयो ।
नेपाल फर्कने क्रममा सिमाना बन्द भएपछि उनी महाकालीपारि बालुवाकोटमा विगत दूई सातादेखि क्वारेन्टाइनमा बसेका थिए । मंगलबार साँझ उनको ६५ वर्षीया आमा गौमती भट्ट घरमा बितेको खबर आयो । यस्तो विपदमा पनि घर जान नपाएपछि उनी शिविरमै किरिया बसे।
पाँच महिनाअघि भारतको पिथौरानगढमा मजदुरी गर्न गएका भट्ट लकडाउनपछि घर फर्कँदा धारचुलाको बलुवाकोटमा रोकिएका थिए । ‘घरका मान्छेका लागि एकसरो कपडा र एक छाक पुर्याउनका लागि भारतको काला पहाड चढियो तर अहिले आमा बित्दा पनि घर पुग्न सकिएन,’ बासुदेब भट्टले भने ।
‘सयौं नेपालीसँगै भट्ट पनि धारचुला पुगेका थिए । तीन दिनसम्म आफ्नो देश आउन नाराबाजीसमेत गर्यौं,’ भट्टले दुखेसो गर्दै भने, ‘तर महाकालीमाथिको पुलमा बसेका सुरक्षाकर्मीले गेट खोल्दै खोलेनन् । पाँच दिन भारतीय गौसालामा बास भयो ।’ कालीमा पौडी खेल्न सक्ने हाम फालेर नेपाल आए । तर पौडी खेल्न नसक्ने भट्ट धारचुलाबाट बलुवाकोटको क्वारेन्टाइनमा आएर बस्नु पर्यो ।
चार दिन अगाडि मात्र आमासँग फोनमा कुरा भएको प्रसङ सुनाउँदै भट्टले भने, ‘सन्चो बिसन्चो बताए पनि मैले आमालाई भारतमै क्वारेन्टाइमा बसेको पीडा सुनाइनँ । आमाले केही बिसन्चो भएको बताउनु भएको थियो । त्यस्तोमा पीडामाथि पीडा थप्यो भने आमालाई अप्ठयारो हुन्छ भनेर मैले कुरा लुकाएँ । आमा मेरै चिन्ताले पनि बित्नु भएको होकी जस्तो लाग्छ ।’
परिवारमा रोजगारीका लागि भारत पसेका बासुदेव एक्ला होइन । उनका भाइ लोकेन्द्र भट्ट भारतकै बेंगलोरमा छन् भने अर्का भाइ माधव भट्ट दिल्लीका छन् । भाइ पनि गाउँ पुगेका छैनन् । घरमा एक जना छन् । आमाको मृत्युपछि घर आउँछु भन्दै स्थानीयलाई फोन गरे पनि बासुदेव घर आउन सकेनन् । अन्तत उनी साथीभाइको सहयोगमा क्वारेन्टाइनमा सेतो लूगा लगाएर किरिया बस्न बाध्य छन् ।
शैल्य शिखर नगरपालिकाको वडा नम्बर १ का वडाध्यक्ष भरतबहादुर खडायतले जिल्ला प्रशासन कार्यालय दार्चुलालाई पत्राचार गर्दै मृत्युपछि गरिने कार्यको लागि आवश्यक समन्वय गरिदिन आग्रह गरिएको बताए । उनले बताए अनुसार अहिले बासुदेवका घरमा कान्छो भाई र बृद्ध बुवा छन् । कमाई गर्ने छोराहरु घर नपुगेकोमा वृद्ध वाबु पनि चिन्तित छन् । ‘हामीले सिडियो सापसँग फोन गरेर पहल गर्न आग्रह गरेका छौ । हाम्रो हातबाट हुने सहयोग गरेका छौं । बाँकी प्रशासनको हातमा छ,’ खडायतले भने ।
दार्चुलाका प्रमुख जिल्ला अधिकारी यदुनाथ पौडेलले शैल्यशिखर नगरपालिका वडा नम्बर १ कार्यालयबाट आएको पत्रको आधारमा भारतीय प्रशासनसँग आवश्यक सहयोगको लागि आग्रह गरेको बताए । ‘हामीले आवश्यक समन्वयको लागि भारत सरकारलाई पत्र पठाएका छौं । पारिबाटै सहजीकरण भयो भने घर आउने बाटो खुल्छ । हामीले यो बिषयमा केहि गर्न सक्दैनौँ ,’ पौडेलले बताए ।
प्रतिक्रिया दिनुहोस !
