बुटवल : कोरोना महामारी रोकथाम, उपचारका लागि प्रदेश ५ मा स्वास्थ्य संस्थामा उपकरण र पूर्वाधार थप गरिएको छ । कोरोना उपचारका लागि प्रदेश सरकारले ५ सय ३९ बेडको आइसोलेसन अस्पताल बनाएको छ । बुटवलमा ५० बेडको कोरोना विशेष अस्पताल निर्माण भएको छ । जसमा १० वटा आइसियु र भेन्टिलेटर जडान गरिएको छ । यो कोरोना महामारी सुरु भएपछि धागो कारखानाको भवनमा बनाइएको अस्पताल हो ।
प्रदेश सरकारले भैरहवाको भीम अस्पताल, बुटवलको कोरोना विशेष अस्पताल, दाङको आर्युवेद प्रदेश अस्पताल र नेपालगञ्जको भेरी प्रादेशिक अस्पताललाई कोरोना विशेष अस्पतालका रुपमा तोकेर आइसोलेसन बनाइएको छ । यी चार अस्पतालमा २ सय ३० वेड बनाइएको छ ।
१२ जिल्लाका अन्य विभिन्न ४८ अस्पतालमा ३ सय ९ बेड रहेको स्वास्थ्य निर्देशनालयका प्रवक्ता रोशनलाल चौधरीले जानकारी थिए । प्रदेशमा ६ हजार ३ सय ३७ बेडको क्वारेन्टाइन बनाइएको छ । जसमा १६ सय ४६ जना बसेका छन् ।
प्रदेश सरकारले कोरोना परीक्षणका लागि भैरहवा, घोराही र नेपालगञ्जमा प्रयोगशाला बनाउने निर्णय गरेको छ । मुख्यमन्त्रीका प्रेस सल्लाहकार शेरबहादुर केसीका अनुसार तीमध्ये भैरहवाको प्रयोगशाला सञ्चालनमा आइसकेको छ भने घोराही र नेपालगञ्जको प्रयोगशालामा उपकरण जडना भएका भइरहेका छन् ।
प्रदेश सरकारले कोरोना विशेष अस्पतालको निगरानीका लागि चार जना मन्त्रीसमेत खटाएको छ । आन्तरिक मामिला तथा कानून मन्त्री कुलप्रसाद केसी दाङ, भौतिक पूर्वाधार विकास मन्त्री बैजनाथ चौधरी बाके, उद्योग, पर्यटन वन तथा वातावरण मन्त्री लिला गिरी बुटवल र सामाजिक विकास मन्त्री सुदर्शन बराल भैरहवाका अस्पतालमा खटिएका छन् ।
प्रदेश सरकारले १० करोडको कोरोना विपद कोष बनाएर स्वास्थ्य संस्था सुधारको कामसमेत गरेको छ । चार प्रादेशिक अस्पतालमा आइसियु, भेन्टिलेटर थपका लागि दुई÷दुई करोड रकम बिनियोजन गरिएको छ । भैरहवाका भीम अस्पतालमा भेन्टिलेटर र आइसियु जडान गरिसकिएको छ । बाकेको भेरी अस्पतालमा उपकरण जडान भइरहेको छ । वर्षाै पुराना अस्पतालमा प्रदेश सरकारले उपकरण थप गरी सुबिधायुक्त बनाएको छ ।
प्रदेशमा मंगलबारसम्म १२ सय ५ जनाको आरडिटीबाट कोरोना परीक्षण गरिएको छ । ती सबै नेगेटिभ छन् ।
बुटवलको कोरोना विशेष अस्पताल बुटवल उपमहानगरले बनाएको हो । क्वारेन्टाइन निर्माणको काम सबै स्थानीय सरकारले गरेका हुन् । प्रदेशका चार अस्पतालमा उपकरण जडान र आइसोलेसन बेड निर्माण प्रदेश मातहत भएका काम हुन् ।
प्रदेश सरकारले स्थानीय तहलाई अनुदान समेत दिएको छ । १ सय ९ तह र जिल्ला समन्वय समितिलाई गरी १३ करोड ६० लाख अनुदान दिएको हो । नेपालगञ्ज उपमहानगरले २५ र बुटवल, घोराही र तुल्सीपुरले २० लाखका दरले अनुदान पाएका छन् । अन्य नगरले १५ लाख र गाउँपालिकाले १० लाखका दरले अनुदान पाएका हुन् । यो अनुदानबाट राहत वितरण, कोरोना रोकथामको काम गर्न प्रदेशको निर्देशन छ ।
प्रतिक्रिया दिनुहोस !
