काठमाडौं : प्रतिनिधिसभा राज्य व्यवस्था तथा सुशासन समितिकी सदस्य डा. डिला संग्रौलाले राज्य व्यवस्था समितिको भर्चुअल बैठक तत्काल बोलाउन माग गरेकी छिन् । संग्रौलाले सिंगो मुलुक कोरोना भाइरसको संक्रमणसँग जुधिरहेको र संसदको अधिवेशन चालु नरहेकाले सम्बन्धित सरकारी अधिकारीलाई आमन्त्रण गरी समिति बैठक बोलाउन राज्य व्यवस्था तथा सुशासन समितिकी सभापति शशी श्रेष्ठलाई आग्रह गरेकी हुन् ।
स्वास्थ्य मन्त्रालय कमिसनको हिसाब-किताबमा लागिरहँदा देशभरका स्वास्थ्यकर्मी व्यक्तिगत सुरक्षा उपकरणबिनै खटिरहेकाले उचित सामग्रीको प्रबन्ध गर्न पनि उनले सरकारसँग आग्रह गरेकी छन् । टेस्ट गर्न भनेर ल्याइएका उपकरणहरुको विश्वसनीयतामाथि नै प्रश्न उठेकाले सरकारलाई जिम्मेवार र जवाफदेही बनाउन पनि समितिको बैठक आवश्यक रहेको उनको दावी छ।
भौतिक रुपमा उपस्थित हुन सम्भव नभए उपलब्ध प्रविधिको प्रयोग गरी भर्चुअल बैठक गर्न उनले माग गरेकी छिन् । यस्तै,उनले लकडाउनमा बाटोमा अलपत्र परेकाहरुको उद्दार गर्न सरकारसँग माग गरेकी छिन्।लकडाउनमा फसेकाहरुको तत्काल उद्दार गर्न प्रदेश र स्थानीय निकायसँग समन्वय गर्न गृह मन्त्रालयको ध्यानाकर्षण गराएकी छिन्।
प्रतिक्रिया दिनुहोस !
