दोलखा : लकडाउनका एक महिनादेखि ढुवानी हुन नसक्दा दोलखाका किसान मल र बीउ नपाएर समस्यामा परेका छन् । हिमाली जिल्ला दोलखामा मकै, गहुँ र तरकारी खेती गर्ने मौसमका बेला मल र बीउ अभाव हुँदा कृषक समस्यामा परेका हुन् ।
लकडाउनका कारण निजी तथा सरकारी कम्पनीले मल, बीउ बिक्री नगरेको र व्यवसायीले ढुवानी गर्न नपाएको कारण जिल्लामा मल बीउको चरम अभाव भएको छ । जिल्लामा कृषि कार्यालय नहुनु, मल, बीउ कारोबार गर्ने सीमित एग्रोभेटले पनि ती सामग्री ढुवानी गर्न नपाउँदा पहाडि जिल्लाको मुख्य खेती गर्ने मौसमका बेला मल, बीउ अभावले कृषकहरु समस्यामा परेका छन् । मकै गोड्ने बेलामा र गहुँको उत्पादन बढाउन युरिया मल हाल्न नपाए उत्पादन घट्ने भीमेश्वर नगरपालिका-४, जिलुका किसान छविन्द्र चौलागाईले चिन्ता व्यक्त गरे ।
जिल्लाको माथिल्लो भूभागमा मकै रोपिसकेका किसानलाई मल अभाव र तल्लो भूभागका किसानले मकैको बीउ नै अभावको समस्या झेलिरहेको थापा एग्रोभेटका प्रोप्राइटर बासु थापाले जानकार दिए । बर्षे आलु गोड्ने बेला भएको छ । किसानले आलु गोड्ने बेलामा मल नपाउँदा उत्पादन घट्ने र लागत समेत नउठ्ने हुँदा दोहोरो मारमा पर्ने भीमेश्वर नगरपालिका–३, पाखाटोलका किसान शंकर श्रेष्ठले बताए ।
जिल्लामा इजाजत प्राप्त निजी डिपो र सहकारीमार्फत रासायनिक मलको आपूर्ति तथा बिक्री हुने गरेकोमा उनीहरुले पनि करिब एक महिनादेखि ढुवानी गर्न पाएका छैनन् । लकडाउनका कारण खेतीपातीको काम गर्न समस्या भइरहेका बेला मलसमेत नपाउँदा चिन्ता थपिएको किसान बताउँछन् । लकडाउन यथावत् रहेकाले खेतीपाती गर्न र मल तथा बीउबिजनको जोहो गर्न सकिँदैन कि भन्ने चिन्ता किसानहरूमा थपिएको ओली एग्रोभेट चरिकोटका प्रोप्राइटर शान्तिप्रसाद ओली बताउँछन् ।
तत्कालीन कृषि विकास कार्यालयको तथ्यांकअनुसार जिल्लामा करिब तीनहजार टन रासायनिक मल खपत हुने गरेको थियो । विशेषत जिल्लामा युरिया, डीएपी र पोटास मलको प्रयोग हुने गरेको पाइएको छ । जिल्लाको लागि आवश्यक धानको बीउको मौज्दात शून्य जस्तै रहेको विभिन्न स्थानीय तहहरुले जनाएको छन् । २१९१ वर्ग किलोमिटर क्षेत्रफल रहेको दोलखाको २६ दशमलब ४५ प्रतिशत क्षेत्रफलमा कृषि खेती हुने गरेको तथ्याङ्क पाइन्छ ।
बीउ नपाएर किसानले बाँझो राखेको भीमेश्वर नगरपालिका २, न्यागलको जमिन । .
प्रतिक्रिया दिनुहोस !
