रामग्राम नगरपालिकाले राहतमा दिएको चामल ‘न्यून गुणस्तर’प्रमाणित
वैशाख ७, २०७७ आइतबार १८:१६:०
परासी : पश्चिम नवलपरासीको रामग्राम नगरपालिकाले राहतमा वितरण गरेको चामल न्यून गुणस्तर भएको प्रमाणित भएको छ । चामल नेपाल सरकारले तोकेको मापदण्ड विपरीत रहेको र तौलमा समेत कमी भएको पाइएपछि कारबाहीका लागि प्रक्रिया अघि बढाइएको छ ।
खाद्य प्रविधि तथा गुण नियन्त्रण कार्यालय भैरहवाले गरेको नमूना परीक्षणमा चामल न्यून गुणस्तर र नेपाल सरकारले तोकेको मापदण्ड विपरीत रहेको पाइएको कार्यालयका खाद्य निरीक्षक श्रवणकुमार ढुंगानाले जानकारी दिए ।
जिल्ला स्तरीय छानविन समितिसँगै खाद्य प्रविधि तथा गुण नियन्त्रण कार्यालय र गुणस्तर तथा नाप तौल कार्यालय बुटवलले छानविन सुरु गरेका थिए । त्यस क्रममा ३ सय ७० ग्रामसम्म तौलमा कमी पाइएको गुणस्तर तथा नाप तौल कार्यालयका खाद्य निरीक्षक नुरुल ऐन भाटले बताए । ‘प्रयोगशालामा नमूना परीक्षण गर्दा न्यून गुणस्तर पाइयो । नेपाल सरकारले तोकेको मापदण्डभन्दा पनि कमसल पाइएकाले अब कारवाही प्रकृया अघि बढ्छ', खाद्य प्रविधि तथा गुण नियन्त्रण कार्यालयका खाद्य निरीक्षक ढुंगानाले भने । न्यून गुणस्तर भएको चामलमा क्यालोरी नहुने उनले बताए ।
क–कसलाई कारवाही हुन्छ भन्ने प्रश्नमा उनले भने,‘अनुसन्धान भइरहेको छ । यसबारे भन्न मिल्दैन । पछि थाहा पाउनुहुन्छ ।’ तौल कमबारे सरकारी वकिलमार्फत अदालतमा मुद्दा दायर हुने गुणस्तर तथा नाप तौल कार्यालयका खाद्य निरीक्षक भाटले बताए ।
नगरपालिकाले वडा कार्यालयमार्फत विपन्न परिवारको संख्याका आधारमा ५, १० र १५ केजी चामल, आधा लिटर तेल, एक केजी दालका दरले वितरण गरेको थियो । खाद्य वस्तुको गुणस्तर कम भए अधिकतम् ५० हजार जरिवाना र ५ वर्षसम्म कैद सजाय हुने प्रावधान छ । त्यसैगरी नापतौलमा लापरबाही भएको पाइएमा ३० हजार जरिवाना र ३ वर्ष कैद सजाय हुने प्रावधान रहेको छ ।
नगरपालिकाका २३ सय घरधुरीलाई राहत वितरण गर्न परासीस्थित राजेश राईल मिलबाट नगरपालिकाले २ सय ५० क्विन्टल सोना मनसुली(मोटा) चामल १० लाखमा खरिद गरेको थियो । राहत चामल न्यून गुणस्तर भएको प्रमाणित भएपछि नगरपालिकाले नयाँ खरिद प्रकृया अघि बढाएर मसिनो स्टिम चामल वितरण गर्ने नगर प्रमुख नरेन्द्रकुमार गुप्ताले जानकारी दिए ।
प्रतिक्रिया दिनुहोस !
