थाक्रे (धादिङ) : लकडाउनका कारण हिँडेर आफ्नो आफ्नो गृह जिल्ला जान लागेका यात्रुलाई धादिङको थाक्रे गाउँपालिकाले आफ्नै सवारी साधनमा राखेर पालिकाको सीमान कटाइदिने गरेको छ । लकडाउन लम्बिंदै जाँदा काठमाडौं उपत्यका छाडेर पृथ्वीराजमार्ग हुँदै देशका विभिन्न जिल्ला जाने मजदुरहरुको सङ्ख्या बढ्न थालेपछि गाउँपालिकाले यस्तो उपाय अपनाएको हो ।
पसिना बगाउँदै बालबच्चा र पोकापुन्तुरा भिरेका मजदुरहरुको कष्टपूर्ण यात्रा देखेर गाउँपालिकाले गाडीमा राखेर राजमार्गको सीमाना कटाइदिने गरेको हो । राजधानीमा सामान ढुवानी गरेर फर्केका सवारी साधन फेला परेसम्म जहासम्म पठाउन मिल्छ त्यहीसम्मै पठाउने गाउँपालिकाकी उपाध्यक्ष अम्विका रुपाखेतीले बताइन् ।
उनले भनिन्, ‘लकडाउन भनेको आफ्नो पालिकाभित्रको नागरिकलाई घरभित्रै राख्नु मात्रै होइन । देशका अन्य ठाउँका नागरिकलाई हाम्रो पालिकाभित्र सडकमा हिँड्न दिइरहनु पनि लकडाउन होइन, उनीहरुको बाध्यता र समस्या बुझेर गाडीमा चढाएर हामीले गाउँपालिकाको सीमाना कटाइदिने गरेका छौँ ।’
प्रतिक्रिया दिनुहोस !
