सुर्खेत : लकडाउनका कारण बाटोमै अलपत्र परेका नागरिकको उद्दार गरिएको छ । लकडाउन लम्बिएपछि देशका विभिन्न स्थानबाट कर्णाली भित्रिनेहरुलाई उद्दार गरी प्रदेश सरकारले क्वारेन्टाइनमा राखेको हो । खान र बस्न समस्या भएपछि देशका विभिन्न स्थानबाट पैदल हिँडेर आएकाहरुको उद्दार गरिएको हो ।
मजदुरीका लागि विभिन्न स्थानमा गएका कर्णालीबासीहरु यतिबेला घर फिर्ता हुँदैछन् । उनीहरु हप्तादिन लगाएर पैदल हिँडेर कर्णाली र प्रदेश नम्बर ५ को सिमाना बबई नाकासम्म आएका हुन् । बबईमा रोकिएका उनीहरुलाई सम्बन्धि स्थानीय तह र प्रदेश सरकारले उद्दार गरिरहेका छन् । उद्दार गरेर ल्याइएका उनीहरुलाई वीरेन्द्रनगरको खुलामञ्चमा रहेको क्वारेन्टाइनमा राखिएको छ । नेपाली सेनाले व्यवस्थापन गरेको उक्त क्वारेन्टाइनमा राखिएका उनीहरु सरकारले तोकेको अवधिसम्म त्यहाँ बस्नेछन् ।
खुलामञ्चको क्वारेन्टाइनमा दुई सय पाँच जनालाई राखिएको छ । पछिल्लो समय देशका विभिन्न स्थानबाट कर्णालीबासीहरु भित्रिन थालेका हुन् । आफ्नै जन्मभूमिमा मरौला भनेर पैदल हिँडेर बबईसम्म आएको कालिकोटका कलबहादुर खड्काले बताए । ‘काम गर्दासम्म रुपैयाँ पाइयो, त्यसपछि रुपैयाँ नपाउँदा छाक टार्न समस्या भयो’, खड्काले भने, ‘बरु गाउँमा उब्जाउ गरेको खाउँला भनेर फर्किएका हौं ।’ यस्तै प्रदेशभित्रैका जिल्लामा अलपत्र परेकाहरुलाई स्थानीय तहले खान र बस्ने व्यवस्थापन गरिरहेका छन् । अलपत्र परेका अन्य प्रदेशका नागरिकलाई खान र बस्न व्यवस्था गरिएको वीरेन्द्रनगरका कार्यवहाक मेयर मोहनमाया ढकालले बताइन् ।
कर्णाली सरकारले देशका विभिन्न जिल्लाबाट फर्किएकाहरुलाई सम्बन्धित जिल्लामाा पठाउने गृहकार्य शुरु गरिएको जनाएको छ । प्रत्येक दिन कर्णालीमा बाहिरबाट आउने संख्या बढ्न थालेपछि उनीहरुलाई अनिवार्य क्वारेन्टाइनमा राख्ने गरी सम्बन्धित जिल्लामा पठाउने सरकारले तयारी गरेको हो । ‘कर्णाली फर्कने सबैलाई सुर्खेतमा राख्नसक्ने अवस्था छैन’, सामाजिक विकास मन्त्री दल रावलले भने, ‘कर्णालीका सबै पालिकाहरुले क्वारेन्टाइन बनाएका छन्, अब सुर्खेतसम्म आएकाहरुलाई क्वारेन्टाइनमा राख्नेगरी सम्वन्धित जिल्ला पठाउने विषयमा छलफल भइरहेको छ ।’
कर्णाली भित्रने प्रमुख नाका बबईमा दैनिक पचास जनाभन्दा बढी नागरिकहरु आइरहेको मन्त्री रावलले जानकारी दिए । मन्त्री रावलले थपे, ‘अझैं आउनेक्रम बढिरहेको छ, उनीहरुलाई अब सम्बन्धित जिल्लाहरुमै पठाउने व्यवस्था मिलाउन प्रहरीलाई जिम्मेवारी दिने की भन्ने विषयमा छलफल भइरहेको छ ।’ मुगु, डोल्पा र हुम्लाका नागरिकलाई भने अनिवार्य सुर्खेतकै क्वारेन्टाइनमा राख्ने गरी व्यवस्थापन गरिएको मन्त्री रावलको भनाइ छ । बाँकी सात जिल्लाका नागरिकलाई भने जिल्लामा पठाइए पनि पालिकाहरुले बनाएको क्वारेन्टाइनमा अनिवार्य राखिने मन्त्री रावलले जनाए ।
प्रतिक्रिया दिनुहोस !
