सिन्धुली : सिन्धुलीको कमलामाई नगरपालिका र दुधौली नगरपालिकाले विपन्न र मजदुर परिवारलाई राहत वितरण गरेका छन् । कोरोना भाइरस (कोभिड–१९)को संक्रमणको त्रासबीच लकडाउन हुँदा विपन्न र श्रमिक परिवारमा खानको समस्या भएपछि दुबै नगरले २ हजार पाँच सय ७५ जना परिवारका लागि खाद्यान्न राहत वितरण गरेका हुन् ।
लकडाउनको समय बढ्दै जाँदा दुबै नगरले श्रमिक तथा विपन्न परिवारका लागि चामल, दाल, नुन, तेल लगायतका राहत सामाग्री वितरण गरेका हुन् ।
कमलामाई नगरपालिकाले मात्र नगरका १४ वटै वडामा गरी हालसम्म १ हजार ५ सय ८९ जना मजदुर तथा विपन्न परिवारलाई खाद्यान्न लगायतका राहत प्याकेज उपलब्ध गराएको नगर प्रमुख खड्गबहादुर खत्रीले जानकारी दिए ।
वडाबाट सिफारिस भइ आएका १ हजार १ सय ३३ अति गरिब, मजदुर तथा अप्ठेरोमा परेका विद्यार्थी परिवार र अन्य क्षेत्रका गरि १ हजार ५ सय ८९ परिवारलाई राहत वितरण गरिएको खत्रीको भनाइ छ । यस्तो राहत सामाग्रीमा नेपाल रेडक्रस र प्लान नेपालले समेत सहयोग गरेको छ ।
‘नगरको समन्वयमा एकद्वार प्रणालीबाट वितरण गरिएको राहतमा नगरपालिकाले खाद्यान्न सामाग्री र नेपाल रेडक्रस सोसाईटी र प्लान नेपालले सरकारले तोकेको मापदण्ड अनुसारको खाद्यान्न आउने नगद राहत दिएको हो,’ उनले भने । रेडक्रसले प्रति परिवार २ हजार ७ सय ३० रुपैयाँ उपलब्ध गराएको छ ।
लकडाउन सुरु भएको पहिलो सातामा नगरले ६२ जना गिट्टी फुटाउने श्रमिकलाई राहत दिएको थियो । त्यसयता लगातार लकडाउन थपिएपछि बिहान बेलुकाको छाकटार्न मुस्किल भएका परिवारको पहिचान गरी थप राहत वितरण गरिएको हो ।
नगरले १३ जना विद्यार्थीहरुलाई समेत राहत वितरण गरेको छ । नगरले राहत वितरणका लागि मापदण्ड निर्धारण समेत गरेको छ ।
उता दुधौली नगरपालिकाले हालसम्म ९ सय ८६ घरपरिवारलाई राहत सामाग्री वितरण गरेको जनाएको छ । दुधौली नगरपालिकाका प्रमुख घनश्याम राउतका अनुसार नगरका विभिन्न ९ वटा वडाका विपन्न र मजदुर परिवारलाई प्रति परिवार १५ किलोग्राम चामल लगायतका राहत वितरण गरेको हो ।
‘हामीले नगरका वडा नं. ३, ४, ६, ७, ८, ९, १०, ११ र १४ मा ९ सय ८६ परिवारका लागि १ सय ४८ कुन्टल २० केजी चामल लगायतका खाद्यान्न सामाग्री वितरण गरेका छौं,’ राउतले भने ।
अन्य ५ वटा वडामा भने राहत वितरणका लागि वडाबाट लक्षित परिवारको नाम सिफारिस भइ नआएकाले वितरण गर्न बाँकी रहेको छ । ति वडाहरुमा पनि छिट्टै राहत सामाग्री वितरण गरिने उनको भनाइ छ ।
प्रतिक्रिया दिनुहोस !
