अस्पताल तालाबन्दी प्रकरण : उपप्रमुख थापा संयोजक रहने गरी छानविन समिति

स्याङ्जा : गल्याङ नगर अस्पतालका कर्मचारी तालाबन्दी र आन्दोलनका विषयमा निष्पक्ष छानविन गरी उपयुक्त राय पेशा गर्ने भन्दै नगर स्तरीय छानविन समिति गठन भएको छ । गल्याङ नगर कार्यपालिकाको बैठकले उपप्रमुख देवीसरा थापाको संयोजकत्वमा छ सदस्यीय छानविन समिति गठन गरेको हो । समितिमा ४ जना वडाध्यक्ष र एक जना नगरपालिकाका कर्मचारी छन् । 

समितिका अन्य सदस्यहरुमा नगरप्रबक्ता एवं वडा १ का अध्यक्ष गणेश बस्याल, २ का अध्यक्ष ईवप्रसाद कर्माचार्य, ७ का अध्यक्ष रामवीर गुरुङ, १० का अध्यक्ष ध्रुव शर्मा पङ्गेनी र सामाजिक शाखा प्रमुख थानापति न्यौपानेलाई चयन भएका हुन् । न्यौपानेलाई अस्पताल व्यवस्थापकको जिम्मा दिने निर्णय पनि सोही बैठकले गरेको छ ।

समितिलाई अस्पतालमा उत्पन्न परिस्थितिको बारे अध्ययन गरी उचित सुझाबसहित राय पेश गर्ने जिम्मा दिइएको हो । गएको बुधवार आठ महिनादेखि तलब नपाएको भन्दै स्वास्थ्यकर्मीसहित १६ जना कर्मचारीले मागपत्रसहित गल्याङ नगर अस्पतालमा ताला लगाएका थिए । 

यसैबीच, गल्याङ नगर प्रमुख भुपराज अधिकारीले विज्ञप्ति जारी गर्दै अस्पतालको विषयमा सामाजिक सञ्जाल तथा विभिन्न सञ्चार माध्यममा आएको समाचारको विषयमा गम्भीर ध्यानाकर्षण भएको जनाएका छन् । 

विश्वभरि महामारीको रुपमा फैलिएको कोरोना भाइरस (कोभिड–१९) को विरुद्व विभिन्न तरिकाले सामना गरिरहेको सन्दर्भमा आकस्मिक रुपमा आएको यो घटनाले आफू आश्चर्यचकित भएको विज्ञप्तिमा उल्लेख छ । आन्दोलनको प्रक्रियाभन्दा बाहिर गइ अस्पताल व्यवस्थापन समितिलाई लिखित तथा मौखिक कुनै किसिमका जानकारी नदिइ एकाएक अस्पताल बन्द गरिनु शंकास्पद रहेको उल्लेख छ । विषम परिस्थितिमा जुनसुकै बहानामा भए पनि यस्तो खालको घटना हुनु दुखद रहेको विज्ञप्तिमा छ ।