धनगढीमा सुत्केरी र गर्भवतीलाई निःशुल्क एम्बुलेन्स

धनगढी : लकडाउन अवधिमा धनगढी उपमहानगरपालिकामा सुत्केरी र गर्भवतीलाई नि:शुल्क एम्बुलेन्स सेवा दिने भएको छ। आफ्नो नगरभित्रका अप्ठेरोमा परेका सुत्केरी तथा गर्भवतीलाई निःशुल्क एम्बुलेन्स सेवा उपलब्ध गराउने उपमेयर शुशिला मिश्र भट्टले जानकारी दिइन्।

सुत्केरी, गर्भवती र प्रशव अवस्थाका महिला जसको आर्थिक अवस्था कमजोर रहेको महिलालाई निःशुल्क एम्बुलेन्स सेवा दिने निर्णय भएको उप मेयर भट्टले बताइन्। ‘उप-महानगरपालिका भित्र यो सुविधा लागू हुने छ’ उपमेयर भट्टले भनिन्, ‘धनगढी बाहिर जानलाई भने यो सेवा छैन।’ 

सुत्केरी, गर्भवती र प्रशब अवस्था भनेको अति संवेदनशील अवस्था भएकाले यस्तो व्यवस्था गरेको भट्टको भनाई छ। ‘लकडाउनका कारण ज्यालादारी काम गर्न नपाएका मजदुर परिवार, अति विपन्न र गरिव परिवारमा समस्या हुने भएकाले एम्बुलेन्स सेवा निःशुल्क गरिएको हो’ उनले भनिन्। एम्बुलेन्स सेवाका लागि से १ च १२१८ नम्बरको एम्बुलेन्स तयारी अवस्थामा रहेको उपमहानगरले जनाएको छ।