बुटवल : प्रदेश ५ मा कक्षा नौसम्मको नतिजा प्रकाशनसँगै विद्यार्थी भर्ना गर्ने निर्णय भएको छ । प्रदेशको सामाजिक विकास मन्त्रालयले अलाइन, टेलिफोन तथा सुरक्षित रुपमा विद्यार्थी भर्ना गरी पुस्तक वितरण गर्न स्थानीय तहलाई आग्रह गरेको हो ।
कोरोना महामारीका कारण ठप्प रहेको शिक्षा क्षेत्रलाई चलायमान बनाउन मन्त्रालयले यस्तो निर्णय गरेको हो । कक्षा ९ सम्मको नतिजा प्रकाशन र विद्यार्थी भर्ना गर्न मन्त्रालयले स्थानीय तहलाई भनेको छ ।
प्रदेश ५ का करिब ५७ सय विद्यालयमा ११ लाख हाराहारीमा विद्यार्थी छन् । सामाजिक विकास मन्त्रालयले नतिजा प्रकाशन गर्नका लागि स्थानीय तहसँग समन्वय गर्ने निर्णय गरेको छ । कोरोना महामारीका कारण तोकिएको मितिभन्दा पहिले नै परीक्षा सकिए पनि नतिजा प्रकाशन हुन सकेको छैन ।
नतिजा प्रकाशनसँगै शारीरिक दूरी कायम राखेर विद्यार्थी भर्ना गर्ने निर्णय समेत मन्त्रालयले गरेको छ । विद्यालय तहसम्मको अधिकार स्थानीय तहमा रहेकाले प्रदेश मन्त्रालयले तहसम्म समन्वय गर्ने निर्णय गरिएको हो । लकडाउनलाई पालना र सुरक्षितहुँदै भर्ना सुरु गर्ने निर्णय मन्त्रालयले गरेको उपसचिव थानेश्वर ज्ञवालीले जानकारी दिए ।
मन्त्रालयले पाठ्यपुस्तक ढुवानी समेत सूचारु गर्ने निर्णय गरेको छ । खाद्यवस्तु र औषधिको ढुवानी जस्तै पाठ्यपुस्तक ढुवानी गर्ने योजना बनाइएको छ । पुस्तक ढुवानी गर्न आन्तरिक मामिला तथा कानुन मन्त्रालयलाई आग्रह गरेर प्रशासन कार्यालयबाट पासको व्यवस्था गर्ने निर्णय सामाजिक विकास मन्त्रलायले गरेको छ ।
सामाजिक विकास मन्त्री सुदर्शन बरालको अध्यक्षतामा बसेको बैठकले हरेक विद्यार्थीबीच पाठ्युस्तक पुराउने योजना बनाएको हो । विद्यालयले लिएको परीक्षाको नतिजा प्रकाशन नहुदा विद्यार्थीहरु कुन पुस्तक पढ्ने भन्नेमा अन्योल छन् ।
नतिजा प्रकाशनपछि पठनपाठन सुरु हुनेछ । अभिभावककै निगरानीमा समेत बालबालिकाले पढ्न पाउनेछन् । नयाँ शैक्षिक सत्रको सुरुवातमा खास प्रभाव नपरे पनि जेठभित्रै कक्षा सञ्चालन गर्नुपर्ने बाध्यता छ । शैक्षिक सत्रको निरन्तरताका लागि पनि पठनपाठन गराउनुपर्ने शिक्षा सरोकारवालाहरु बताउँछन् ।
माध्यमिक तहसहित विश्वविद्यालय तहका परीक्षाहरु ठप्प छन् । कतिपय कलेजले अनलाइनमार्फत पठनपाठन निरन्तरता दिइरहेका छन् । विकट क्षेत्र र प्रविधिको पहुँचभन्दा बाहिर रहेका विद्यार्थी भने यो अवसरबाट बञ्चित छन्।
कोरोनाको महामारी कतिञ्जेल रहिरन्छ भन्ने निर्क्योल नभएपछि तत्कालका लागि नजिता प्रकाशन गरेर पाठ्यपुस्तक ढुवानी गर्ने योजनामा मन्त्रालय पुगेको हो । स्थानीय तहहरुले कक्षा ८ सहित सबै कक्षाको नतिजा प्रकाशनको अन्तिम तयारी थालेका छन् ।
स्थानीय तहले माध्यमिक शिक्षा (एसईई) परीक्षा नदिई बसेका विद्यार्थी लक्षित कक्षाहरु सञ्चालन गरिरहेका छन् । रेडियो, टेलिभिजनसहित सामाजिक सञ्जालबाट ती परीक्षाहरु सञ्चालन भएका हुन् । रुपन्देहीको सैनामैना नगरपालिकाले दूर शिक्षा सुरु गरेको छ । गणित, विज्ञान, अंग्रेजी विषयलाई प्राथमिकतामा राखेर कक्षा सञ्चालन भएका छन् ।
सैनामैना नगरपालिकाका प्रमुख चित्रबहादुर कार्कीले विद्यार्थीको भविष्यलाई ध्यानमा राखेर कक्षा सञ्चालन गरिएको बताए । यो कक्षाले परीक्षाको तयारी गरिरहेका विद्यार्थीलाई लाभ मिल्ने उनले बताए ।
प्रतिक्रिया दिनुहोस !
