धनगढी : कैलालीको अत्तरिया क्षेत्रका विभिन्न सामुदायिक वनमा अतिक्रमण गरी बनाइएका संरचना हटाएको छ । सामुदायिक वनका उपभोक्ता र सब-डिभिजन वन कार्यालय अत्तरियाले अतिक्रमण गरी निर्माण गरिएका संरचना हटाएको हो ।
विश्वभर महामारीको रुपमा फैलिएको कोरोना भाइरस (कोभिड-१९) को संक्रमण रोक्न सरकारले जारी गरेको लकडाउनमा अत्तरिया क्षेत्रमा वन अतिक्रमणले तीव्र भएपछि संरचना हटाएको हो ।
अतिक्रमणको चपेटामा परेका गोदावरी नगरपालिका-२ मा रहेको दुर्गालक्ष्मी सामुदायिक वन, वडा नम्बर १ मा रहेको चाहाना सामुदायिक वन र गोदावरीधाम आसपास राजमार्गका विभिन्न स्थानमा संरचनाहरु निर्माण गरेका थिए ।
अत्तरियामा रहेको दुर्गालक्ष्मी सामुदायिक वनको सुप समावेसी आधारभुत विद्यालय नजिकै रहेको करिब ५ कठ्ठा क्षेत्रफलमा निर्माण भएका संरचना हटाएको हो । 'लकडाउनको फाइदा उठाउँदै विभिन्न व्यक्ति वन अतिक्रमण गर्न थालेपछि बनेका संरचना हटाएको हो,' दुर्गालक्ष्मी सामुदायिक वनकी अध्यक्ष दुर्गा कडायतले भनिन् । 'संस्थागत रुपमा राखिएका बोर्डहरु समेत हटाउने अभियान सुरु भएको छ ।'
यसैगरी गोदावरी नगरपालिका- ४ बासकोटा जाने बाटोको पुल नजिकै पनि वन क्षेत्र अतिक्रमण भएको र उक्त क्षेत्रसमेत खाली गरिने उनले बताइन् । गोदावरी नगरपालिका-१ धनगढी रोडमा रहेको चाहना सामुदायिक वन पनि अतिक्रमणको चपेटामा परेको छ । नगरपालिकाको कार्यालय अगाडि रहेको वनक्षेत्र अतिक्रमणको चपेटामा परेको हो । उक्त क्षेत्रमा घरटहरा बनाउने प्रयास गरिएको छ । कैलालीमा सबैभन्दा बढी अत्तरिया क्षेत्र आसपासमा वन अतिक्रमण भइरहेको छ ।
डिभिजन वन कार्यालय कैलालीका प्रमुख वन अधिकृत रामचन्द्र कँडेलले वन अतिक्रमण क्षेत्र हटाउने विषयमा कडाइका साथ अगाडि बढेको जानकारी दिए । 'संस्थागत र नीजि प्रयोजनमा अतिक्रमण क्षेत्रलाई खाली गर्ने अभियान सञ्चालन गरेका छौँ, 'उनले भने ।
अत्तरिया क्षेत्रमा सामुदायिक वनमा अतिक्रमण भएको खवर आएपछि खाली गर्न सुरु गरेको कँडेलको भनाइ छ ।
प्रतिक्रिया दिनुहोस !
