सिन्धुली : झण्डै एक साता अघिबाट लगातार परेको असिनापानीका कारण जिल्लाको ८० प्रतिशत जुनारमा क्षति पुगेको छ ।लगातारको असिनापानी र हावाहुरीले जिल्लाका किसानले खेती गर्दै आएको झण्डै १३ सय हेक्टरको जुनारमा क्षति पुगेको हो ।
जिल्लाको जुनार पकेट क्षेत्र मानिएका गोलन्जोर गाउँपालिकाको रतनचुरा, तिनकन्या, वाशेश्वर, भुवनेश्वरी, बितिजोर, डुडभन्ज्याङ कमलामाई नगरपालिकाको जलकन्या, सुनकोसी गाउँपालिकाको मझुवा र दुम्जाबमा असिनाले क्षति गरेको किसानले जनाएका हुन् ।
लगातारको पानी र हावाहुरीले फल लागेको हाँगासमेत भाँचिदिँदा यो वर्ष उत्पादनमा समेत कमी आउने भएपछि किसान चिन्तित समेत बनेका छन् । जुनारमा क्षति हुँदा करिब २४ करोड रुपैयाँ बढीको आम्दानी गुम्ने निश्चित छ।अधिकांश कृषकको जुनार बगैचामा हावाहुरीले क्षति पुर्याएको जुनार कृषक निर्मलकुमार रम्तेलले बताए।
'यो जुनारमा फूल र चिचिला लाग्ने समय हो । तर, फूलबाट चिचिला बन्न थालेका सबै जुनारमा क्षति पुगेको छ । फूल नै नभएपछि फल कसरी लाग्नु । यो वर्ष जुनार कृषकलाई कोरोना भाइरसको भन्दा असिनापानीले बढी सताएको छ,' रम्तेलले भने ।
उनको आफ्नो नर्सरीमा मात्र दश लाख रुपैयाँ बढीको क्षति पुगेको छ । रम्तेलको बारीमा मात्र ७ सयवटा जुनारका बिरुवा छन् । तर, ती अधिकांश बिरुवमा क्षति पुगेको उनले जनाए।
गत वर्षमा जुनारको फल कुहाउने औंसे झिगाबाट अक्रान्त किसान यस वर्ष असिनापानीबाट थप पीडित भएका हुन् । कमलामाई नगरपालिका ३ चपौलीका जुनार कृषक सूर्य धितालका अनुसार हावाहुरी र असिनापानीले गाउँभरीका कृषकको जुनार बगैचा रित्तो बनाएको छ ।
'कोरोनाको त्रासका बीच लकडाउनमा बसेका किसान हावाहुरीका कारण चिन्तित बनेका छन् । जुनार कृषकको मुख्य आम्दानी नै नष्ट भएपछि बोट हेरेर चित्त बुझाउनुको विकल्प छैन्,' धितालले भने ।
जुनार विकास संघ सिन्धुलीका सचिव रामहरी थापका अनुसार जिल्लामा जुनार कृषकहरुले गत वर्ष झण्डै ३२ करोड रुपैयाँबढी आम्दानी लिएका थिए । 'तर, यस वर्ष जुनारमा भएको क्षेतीका कारण कृषकले २४ करोड रुपैयाँ बढी आम्दानी गुमाउनु पर्ने बाध्यता छ,' उनले भने ।
प्रधानमन्त्री कृषि अधुनिकीकरण परियोजना, जुनार सुपरजोन खनियाखर्कका अनुसार जिल्लामा गत आर्थिक वर्षमा ८ हजार ८ सय ८१ मेट्रिक टन जुनार उत्पादन भएको थियो । जिल्लामा झण्डै साढे १३ सय हेक्टर क्षेत्रफलमा हुँदै आएको व्यासायिक जुनार खेतीबाट करिब पाँच हजारले रोजगारी पाएका छन् ।
प्रतिक्रिया दिनुहोस !
