शुभलक्ष्मी विश्वकर्मा
हेटौंडा : तेल बोक्ने ट्याङ्करमा लुकाइछिपाइ लागूऔषध ल्याएको पाइएपछि मकवानपुर प्रहरीले लागूऔषध सहित दुई जनालाई पक्राउ गरेको छ । हेटौंडा उपमहानगरपालिका–१५ स्थित रातोमाटेबाट उनीहरूलाई पक्राउ गरिएको हो ।
पक्राउ पर्नेमा मकवानपुरको थाहा नगरपालिका–४ घर भइ हाल हेटौंडा उपमहानगरपालिका–४ डेरा गरी बस्ने ३१ वर्षीय मानबहादुर थोकर र हेटौंडा–४ का ४५ वर्षीय सेते लामा छन् ।
कोरोना भाइरस संक्रमण जोखिमका कारण जारी लकडाउनको मौका छोपेर तेल बोक्ने ट्याङ्करमा भारतबाट लागूऔषध भित्र्याइएको पाइएको जिल्ला प्रहरी कार्यालय मकवानपुरका प्रवक्ता सुजन पाठकले बताए ।
भारतको रक्सौलबाट तेल बोकेर हेटौंडा हुँदै काठमाडौंतर्फ जाँदै गरेको ना ३ ख ६४६६ नम्बरको ट्याङ्करमा लुकाइछिपाइ ल्याएको लागूऔषध विनसिरेक्स १५५ बोतल प्रहरीले बरामद गरेको हो ।
उनीहरुलाई इलाका प्रहरी कार्यालय पशुपतिनगरका प्रहरी निरीक्षक अरुणकुमार कुशवाहाको टोलीले पक्राउ गरेको थियो । पक्राउ परेकाहरुमाथि आवश्यक अनुसन्धान तथा कानुनी कारबाही भइरहेको प्रहरीले जनाएको छ ।
लागू औषध नियन्त्रण ऐन, २०३३ बमोजिम २ वर्षदेखि १० वर्षसम्म कैद र एक लाख रुपैयाँदेखि २० लाख रुपैयाँसम्म जरिवाना, सवारी साधन समेत जफत हुन सक्ने कानूनी प्रावधान छ ।
प्रतिक्रिया दिनुहोस !
