दोलखा : लकडाउनमै खाडीचौर–जिरी सडकअन्तर्गत चर्नावती खोलामा निर्माणाधीन पुलको आरसीसी ढलान सम्पन्न भएको छ । ३० मिटर लम्बाइ र ११ मिटर चौंडाइको उक्त पुलको मुख्य ढलान कार्य सम्पन्न भएसँगै निर्माण अन्तिम चरणमा पुगेको निर्माण कम्पनी ओमबुद्ध कन्सट्रक्सन प्रालिले जनाएको छ ।
लकडाउनकै संकटमा भए पनि पुलको स्ल्याब ढलान कार्य सम्पन्न भएको ओमबुद्ध कन्सट्रक्सन प्रालिका प्रोपाइटर ग्याल्बो तामाङले बताए । स्ल्याव हाल्ने काम सकिएपछि अब टेवा पर्खाल, पुलमा प्रिमिक्स कालोपत्रे गर्ने लगायतका काम गरी असार मसान्तसम्ममा पुल हस्तान्तरण गरिने तामाङको भनाइ छ । आरसीसी प्रिस्ट्रेस्ड प्रविधिबाट निर्माण गरिएको सो पुलको भारवहन क्षमता ७० टनभन्दा बढी हुने डिभिजन सडक कार्यालय चरिकोटका सब–इञ्जिनियर राजेन्द्र कार्कीले जानकारी दिए ।
आरसीसी प्रिस्ट्रेस्ड प्रविधिमा ढलानको अतिरिक्त पुलको विमबाट झोलुङ्गे पुलको जस्तै स्टिलको लठ्ठाहरु छिराइ त्यसलाई तन्काएर भारबहन क्षमतालाई मजबुत बनाइने प्राविधिक कार्कीको भनाइ छ । यो प्रविधिअनुसार ढलान सेट भएपछि लट्ठा तन्काउँदा पुल ७ सेमीसम्म उचाइ बढ्ने बताइएको छ ।
२०७३ मंसिर २७ मा ३ करोड ९१ लाख ८५ हजार पाँचसय ७६ रुपैयाँमा सम्झौता भएको पुल २०७५ मंसिर १५ मा सम्पन्न गर्ने गरी ओमबुद्ध कन्ट्रक्सन प्रालिले ठेक्का लिएको थियो । माथिल्लो तामाकोशी आयोजनाका पेनस्टक तथा अन्य हेभी सामानहरु ढुवानी गर्न बनाइएको डाईभर्सनका कारण पुलको जिप तयार गर्न नसकिएकोले पुल निर्माणको म्याद थपिएको प्रोपाइटर तामाङले बताए ।
लकडाउनको विषम परिस्थितिमा सडक कार्यालयको सहयोग तथा प्रशासनको समन्वयको कारण पुल निर्माण सम्पन्न हुने चरणमा पुगेको प्रोप्राइटर तामाङको भनाइ छ । चर्नावती पुल नयाँ डिजाइनको भएकोले अन्य पुलको तुलनामा यो प्रविधिको पुल बाढी पहिरोबाट पनि सुरक्षित हुने प्राविधिकहरुले बताए ।
प्रतिक्रिया दिनुहोस !
