भक्तपुर : लकडाउन प्रभावित भक्तपुरका सुनचाँदीका गरगहना बनाउने कालीगढहरुलाई खाद्यान्न राहत वितरण गरिएको छ । भक्तपुर सुनचाँदी व्यवसायी संघले भक्तपुरमा रहेका एकसय पचास कालीगढलाई चामल, दाल, गहुँको पीठो, नुन, तेललगायत राहत वितरण गरेको हो ।
संघका अध्यक्ष प्रदीपरत्न शाक्यले भक्तपुरमा रहेका नेपाली तथा भारतीय कालीगढहरुलाई प्रतिव्यक्ति १० किलो चामल, गहुँको पीठो ५ किलो, दाल २ किलो, चिनी एक किलो, तेल एक लिटर र मस्यौरा २०० ग्राम राहत वितरण गरिएको जानकारी दिए ।
कोरोना भाइरस संक्रमण नियन्त्रण तथा व्यवस्थापनको लागि सरकारले घोषणा गरेको देशव्यापी लकडाउन जारी रहेको छ । लकडाउन लम्बिएसँगै कालीगढहरुलाई समस्या भएको जानकारी आएपछि उनीहरुलाई रहात वितरण गरिएको अध्यक्ष शाक्यले बताए ।
लकडाउन चाँडै टुंगिएला भन्ने आशमा रहेको तर यो लम्बिएपछि आफूहरुलाई खान नै समस्या भएको कालीगढहरु बताउँछन् । उनीहरुका अनुसार एकमहिना त जसोतसो दैनिकी गुज्रेको तर लकडाउन बढेपछि काम पनि नभएको र खाद्यान्नसमेत अभाव भएको उनीहरुको भनाइ थियो ।
सुनचाँदीका कालीगढहरुले स्थानीय तह तथा अन्य संघसंस्थाबाट ुमेत राहत पाउन नसकेपछि संघले राहत व्यवस्थापन गरेको अध्यक्ष शाक्यले स्पष्ट पारे ।
भक्तपुरमा करिब तीनसय सुनचाँदी व्यवसायीहरु रहेका छन् । अहिले लकडाउनले सुनचाँदी पसलमात्रै बन्द छैन । सर्वसाधारणका विवाह, ब्रतवन्धलगायतका शुभकार्यसमेत ठप्प छन् । जसले गर्दा सुनको व्यापार पनि शून्य रहेको सुनचाँदी व्यवसायीहरु बताउँछन् । तर सुन खेल जाने तथा नासिने वस्तु नभएकाले व्यवसायीहरुले घाटा व्यहोर्न नपरे पनि आफ्नो आर्थिक आयस्ता भने प्रभापित भएको उनीहरुको भनाइ रहेको छ ।
व्यवसायीहरुका अनुसार सुनचाँदीका नयाँ नयाँ डिजाइन आउने भएका कारण स्थानीय कालीगढहरु विस्थापित हुँदै आएका छन् । यहाँका मौलिक सुनचाँदीका गहनाको माग तथा प्रयोग घट्दै आएकाले स्थानीय कालीगढहरु पनि विस्थापित हुँदै आएको भक्तपुर सुनचाँदी व्यवसायी संघका पूर्वअध्यक्ष पद्मसुन्दर शाक्यले बताए ।
स्थानीय कालीगढ विस्थापित हुँदै गएपछि उनीहरुको ठाउँ भारतीय कालीगढहरुले लिएको उनको भनाइ थियो ।
‘स्थानीय मौलिक गरगहनाको प्रयोग नै हुन छोडेको छ । त्यसैले स्थानीय कालीगढहरु पनि विस्थापित हुँदै आएका छन्’, पूर्वअध्यक्ष शाक्यले भने, ‘अहिले स्थानीय कालीगढको ठाउँ भारतीय कालीगढहरुले लिएका छन् ।’
प्रतिक्रिया दिनुहोस !
