लकडाउनमा खुलेको बराहपोखरी (फोटोफिचर)

बेंसीसहर : वरिपरि सेता हिमाल । हरियो खर्क, समथर मैदान । वनभरी फुलेका विभिन्न रङ्गका लालिगुराँसले बराहपोखरी तालको सौन्दर्य बढाएको छ । पर्यटकीय गन्तव्यमा प्रख्यात बराहपोखरी लमजुङको मस्र्याङ्दी गाउँपालिका ८ भुलभुलेमा पर्छ । प्राकृतिक, सांस्कृतिक, ऐतिहासिक तथा धार्मिक महत्वको यस क्षेत्र कोरना संक्रमक्रणका कारण जारी लकडाउनमा झनै मुस्कुराएको छ ।

यसअघि वैशाख र भदौ पूर्णिमामा पूजाआज गर्न भक्तजनहरु पुग्ने गर्दथे । लकडाउनकमा गाउँमै थुनिएका मस्र्याङ्दी गाउँपालिकाका स्थानीय यतिबेला बराहपोखरीको यात्रा गरिरहेका छन् । दैनिक १०÷१५ जनाको समूहमा आन्तरिक पर्यटक बराहपोखरी पुग्ने गरेका छन् ।

समुन्द्री सतहबाट तीनहजार ६ सय ५० मिटर उचाइमा रहेको बाह्रपोखरीबाट अन्नपूर्ण र मनास्लु हिमशृंखला अन्तर्गतका दर्जनौ हिमालको दृश्यावलोकन गर्न सकिन्छ ।  धार्मिक तथा प्राकृतिक रुपमा महत्वपूर्ण यसक्षेत्रको संरक्षण गर्नसके आन्तरिक मात्रै होइन, बाह्य पर्यटकसमेत तान्न सकिन्छ । यहाँ मानव बस्ती नहुँदा खानाको व्यवस्था आफैँ गर्नुपर्छ ।

उच्च लेक र बढी चिसो भएकोले जुनसुकै समयमा पनि बाक्ला कपडा लिएर जानुपर्छ । गर्मी मौसममा भेडीगोठ र गाईगोठ पोखरी नजिकैका खर्कहरुमा पुग्छन् । खर्कमा भेटिने भेडिगोठलेपनि पदयात्रीलाई रोमाञ्चित बनाउँछ । 

बाह्रपाखरी क्षेत्रमा एउटा मात्र ठाँटी छ । त्यहाँ भएको ठाँटीमा सबै पदयात्रीहरु अटाउँदैनन् । टेन्ट, त्रिपाल, रुखको फेद वा पहरामा ओत लागेर बस्न सकिन्छ ।  बराहपोखरी जानको लागि मस्र्याङ्दी गाउँपालिकाको खुदी, भुलभुलेबाट भुष्मेहुँदै, बेंसीसहरबाट चिति माझगाउँ, पुरानो दुबार हुँदै जान सकिन्छ । यस्तै, छिनखोला, दुबारबाट पनि एकै दिनमा पुग्न सकिन्छ ।

गाउँपालिकाबाट रोक 

लकडाउनको समयमा दैनिकजसो आन्तरिक पर्यटकहरु बराहपोखरी घुम्न जान थालेपछि मस्र्याङ्दी गाउँपालिकाले पदयात्रामा रोक लगाएको छ । बराहपोखरी, हर्सिङडाँडा, तातोपानी कुण्डलगायतका क्षेत्रमा जान रोक लगाइएको गाउँपालिका अध्यक्ष अर्जुन गुरुङले बताए । गाउँपालिकाले रोक लगाए पनि सो क्षेत्रमा घुम्ने पर्यटक रोकिएका छैनन् ।