हेटौंडा : बागमती प्रदेशमा पीसीआर र आरडीटी परीक्षण किट अभाव भएको छ । संघीय सरकारबाट प्राप्त किट सकिन लागेको र अब आउने टुङ्गो नहुँदा अभाव भएको सामाजिक विकास मन्त्रालयले जनाएको छ ।
'हामीलाई प्राप्त परीक्षण किट सिमित मात्र बाँकी रहेको छ, मन्त्रालयका प्रवक्ता डा. पुरुषोत्तम राज सेढाईले भने, 'हामीले थप किट माग गरेका छौं, छिट्टै प्राप्त हुने अपेक्षा छ ।' संघीय सरकारसँग पनि परीक्षण किट अभाव रहेकाले जनस्तरमा पुगेर पर्याप्त आरडीटी परीक्षण गर्न समस्या भएको उनले बताए ।
बागमती प्रदेभभित्र रहेका पाँचवटा ल्याबमा बुधबारसम्म दुई हजार दुई सय ५६ जनाको पीसीआर परीक्षण गरिएको मन्त्रालयको तथ्यांक छ । तीमध्ये ७ जनाको रिपोर्ट पोजेटिभ देखिएको छ । भरतपुर अस्पतालमा दुई कोरोना पोजेटिभ देखिएका २ जनाको उपचार भइरहेकोमा एकजना निको भएर घर फर्किएका छन् ।
शुक्रराज ट्रपिकल तथा सरुवा रोग अस्पतालमा ३ जना र पाटन अस्पतालमा २ जना उपचारपछि घर फर्किको मन्त्रालयले जनाएको छ । पीसीआर परीक्षण सबैभन्दा धेरै काभ्रेमा ५ सय ९३ जनामा गरिएको छ । रसुवाका जम्मा २ जनामा मात्र परीक्षण गरिएको मन्त्रालयको तथ्यांक छ । हालसम्म हेटौंडामा रहेको पीसीआर ल्याबबाट मात्र ४ सय ६० जनाको स्वब परीक्षण गरिएको छ ।
हेटौंडाको ल्याबमा पनि परीक्षण किट अभाव भएको किटजन्य रोग अनुसन्धान तथा तालिम केन्द्रले जनाएको छ । बुधबारसम्म प्रदेशभर ८ हजार ९ सय ४० जनाको आरडीटी परीक्षण गरिएको छ ।
तीमध्ये १९ जनामा पोजेटिभ देखिएको थियो । तीमध्ये सबैभन्दा धेरै काठमाडौंमा २ हजार ६ सय ३३ जना र सबैभन्दा कम रसुपामा ९८ जनामा आरडीटी परीक्षण गरिएको छ ।
९ जिल्लाको सरकारी क्वारेन्टाइन खाली
बागमती प्रदेशको ९ जिल्लामा सरकारले निर्माण गरेको क्वारेन्टाइन खाली छ । प्रदेशभर ३ हजार ९ सय ७१ जना क्षमताको क्वारेन्टाइन निर्माण गरिएकोमा हाल १ सय ८३ जना मात्र क्वारेन्टाइनमा रहेको सामाजिक विकास मन्त्रालयले जनाएको छ ।
तीमध्ये धादिङमा १ सय ४०, सिन्धुपाल्चोकमा ३६, रसुवामा ६ र नुवाकोटमा १ जना रहेका छन् । प्रदेशभर घरमै क्वारेन्टीनमा बस्नेहरु भने २ हजार ४ सय ८९ जना रहेका छन् । तीमध्ये नुवाकोटको मात्र १ हजार ३ सय १ जना रहेको मन्त्रालयको तथ्यांक छ । 'काठमाडौंबाट घर फर्किने पछिल्लो समय बढेकाले घरमै क्वारेन्टाइनमा बस्नेको संख्या पनि बढेको हो,' मन्त्रालयका प्रवक्ता सेढाईले भने।
प्रतिक्रिया दिनुहोस !
