देवचन्द्र भट्ट
नुवाकोट : गोठमा बाँधिएको गाई रातको समयमा चोरी मारेर मासु भाग लगाउनेहरुलाई रसुवामा कारवाहीका लागि कारागार चलान गरिएको छ । दुहुनो गाई चोरी गरेर वैशाखको पहिलो साता काट्नेहरु ६ जना जेल चलान भएका हुन् ।
पक्राउ परेका सात जनामध्ये एक जना १५ वर्षभन्दा कम उमेरको रहेकोले रसुवा प्रहरीले चाहेको बेलामा झिकाउने गरी घर पठाएको छ । जिल्ला अदातल रसुवाले पक्राउ परेका तीन जनालाई ५०-५० हजार रुपैयाँ घरौटी राख्न आदेश गरेकोमा तिर्न नसकेपछि उनीहरु पनि जेल परेको रसुवा प्रहरीले जनाएको छ ।
पुर्पक्षको लागि कारागार चलान भएकाहरुमा रसुवाको दक्षिणी भेगमा रहेको उत्तरगया गाउँपालिका वडा नं. ४ का २२ वर्षीय दिनेश थिङ, २० वर्षीय दीपेन्द्र थिङ र १९ वर्षीय विशाल थिङ रहेका छन् । त्यस्तै धरौटी राखेर रिहा हुन आदेश भए पनि धरौटी रकम जम्मा गर्न नसकेर जेल गएकाहरुमा सोही वडा नं ४ कै बाटुली थिङ, सन्तबहादुर थिङ र रामहरि थिङ रहेका छन् ।
उनीहरु तीनै जनासँग अदालतले ५० हजार रुपैयाँ धरौटी मागेको थियो । बालक भएकै कारण रिहा भएका एक जना भने रसुवा उत्तरगया गाउँपालिकाका हुन् । उनको नाम प्रहरीले सार्वजनिक गरेको छैन ।
पुर्पक्षका लागि रसुवा कारागार चलान भएका दुई जनालाई नुवाकोटको पञ्चकन्या गाउँपालिकाबाट दुई साताअघि प्रहरीले पक्राउ गरेको थियो । गाई काट्नेहरुको खोजी रसुवा प्रहरीले तीव्र पारेपछि उनीहरु लुक्नका लागि नुवाकोट आएका थिए ।
बैशाख ३ गते राती कालिका गाउँपालिका वडा नं. ३ का नन्दकुमारी ढकालको दुहुनो गाई चोरी गरेर उनीहरुले काटेका थिए । उनीहरुलाई कारवाहीको माग गर्दै गौवध मुद्दा दायर गरिएको थियो ।
प्रतिक्रिया दिनुहोस !
