भक्तपुर : कोरोना भाइरस संक्रमण नियन्त्रण तथा व्यवस्थापनमा क्रियाशील भक्तपुरको प्रहरी प्रशासनलाई थप अर्को चिन्ता आइलागेको छ । कोरोना भाइरस संक्रमण नियन्त्रण तथा व्यवस्थापन गर्न सरकारले घोषणा गरेको देशव्यापी लकडाउन पालना गराउन खट्नुपर्ने प्रहरी प्रशासनलाई भक्तपुरका हनुमन्ते खोलाको चिन्ता थपिएको हो ।
वर्षा याममा हनुमन्ते खोलामा आउने बाढीले डुबानको समस्या पार्दै आएको छ । अहिले प्रिमनसुन सक्रिय भइरहेको छ । प्रिमनसुनकै बेला हनुमन्ते खोलामा बाढी आएपछि प्रहरी प्रशासनलाई चिन्ता बढाएको हो । प्रत्येक वर्षको वर्षायाममा हनुमन्ते खोलामा आउने बाढीले खोला दायाँबायाँबा बस्ती डुबाउँदै आएका छन् । जसले गर्दा हनुमन्ते खोला दायाँबायाँका सर्वसाधारणले वर्षायामभर राम्ररी सुत्नसमेत पाउँदैनन् । हनुमन्ते खोलामा आएको बाढी कहिले आफ्नो घरआँगन पस्ने हो भन्ने त्रासमा उनीहरु अनिँदो बस्नुपर्ने समस्या रहँदै आएको छ ।
हनुमन्ते खोलामा आएको बाढीले भक्तपुर नपा १ स्थित सल्लाघारी, सृजनानगर र मध्यपुर थिमि नपा ९ स्थित निकोसेरा, राधेराधे, वडा नं ४ स्थित बालकुमारी, नयाँठिमी, चारदोबाटो क्षेत्रको खोला किनारको वस्ती डुबाउँदै आएको छ । त्यस्तै सूर्यविनायक नपा ५ स्थित कटुञ्जे, वडा नं. ४ स्थित दधिकोट, वडा नं. २ र ३ स्थित बालकोट क्षेत्रमा डुबानको समस्या हुँदै आएको छ ।
त्यसैले यसवर्ष हनुमन्ते खोलाले डुबानको समस्या आउने हो कि भन्ने यहाँका प्रहरी प्रशासनलाई चिन्तामा पारेको हो । उक्त चिन्ताबाट मुक्त हुन भक्तपुरकी प्रमुख जिल्ला अधिकारी हुमकला पाण्डे र महानगरीय प्रहरी परिसर भक्तपुरका प्रमुख प्रहरी उपरीक्षक सविन प्रधान नेतृत्वको टोलीले हनुमन्ते खोलाको अवस्था निरीक्षण गरेको छ । प्रिमनसुनमै बढी वर्षा हुन थालेकोले उक्त टोलीले हनुमन्ते खोलाको अवस्थाबारे स्थलगत निरीक्षण गरेको प्रहरी उपरीक्षक प्रधानले जानकारी दिए ।
उनका अनुसार खोलाको दायाँबायाँ हनुमन्ते कोरिडोरको नाउँमा सडक विस्तार तथा केही ठाउँमा पुल निर्माण भइरहेका छन् । कोरिडोर र पुल निर्माणको कारण कतै हनुमन्ते खोलाको प्राकृतिक बहाव थुनिएको छ वा छैन भनी बुझ्न निरीक्षण गरिएको प्रहरी उपरीक्षक प्रधानले स्पष्ट पारे ।
‘वर्षायाम नजिकिँदैछ । त्यसैले अघिल्लो वर्षजस्तो हनुमन्ते खोला बस्तीमा पसेर डुबान हुने स्थिति भए नभएको निरीक्षण गरेका हौं’, उनले भने, ‘केही ठाउँमा हनुमन्ते खोलाका प्राकृतिक बहावलाई बाधा पुर्याउने अवस्था देखेका छौं । ती ठाउँमा सुधार गर्नुपर्ने देखिन्छ ।’
उनका अनुसार हनुमन्ते खोलाको राधे राधे र दक्षिण बाराही क्षेत्रमा खोलाको बहावमा बाधा पुग्ने देखिएको छ । यी दुवै ठाउँमा पुल निर्माण भइरहेको छ । राधेराधेमा हनुमन्ते कोरिडोर निर्माणको क्रममा ग्याबिन वाल उठाउन खनेको माटो खोलामा थुपारिएर हटाइएको छैन । जसले गर्दा खोला उकासिएर पानीको बहावमा बाधा पुग्ने देखिएको प्रहरी उपरीक्षक प्रधान बताउँछन् ।
त्यस्तै मध्यपुर थिमी नपा ४ शंखधर चोक भएर सूर्यविनायक नपा ४ दधिकोट जाने दक्षिण बाराही क्षेत्रमा पनि पुल निर्माणको लागि खनेको माटो हनुमन्ते खोलामै थुपारिएको छ । त्यसले पनि हनुमन्ते खोलाको प्राकृतिक बहावमा बाधा पुग्ने अवस्था रहेको छ । गएको सातादेखि अहिले दैनिकजसो वर्षा भइरहेको छ । जसमध्ये बिहीबार आएको वर्षाले हनुमन्ते खोलाको सतह वर्षायामकै स्तरमा आएको प्रहरीले जनाएको छ । अहिले तर बिहीबार हनुमन्ते खोलाको पानी बस्तीमा पसेको छैन । हनुमन्ते खोलामा आएको बाढीले भक्तपुर नगरस्थित हनुमानघाट, चुपीँघाट, राममन्दिर र बाराहीस्थानस्थित मंगलतीर्थलाई भने डुबाएको थियो ।
प्रहरी उपरीक्षक प्रधानले यस वर्ष हनुमन्ते खोलाकै कारण हुने डुबानको समस्या हुन नदिने अहिल्यै सतर्कता अपनाउन थालिएको बताए ।
प्रतिक्रिया दिनुहोस !
