धादिङको फुलखर्कमा युवकको हत्या

धादिङ : धादिङको गंगाजमुना गाउँपालिकास्थित फुलखर्कको दाङसिङ देउराली गाउँमा धारिलो हतियार (खुँडा प्रहार) गरी एक युवकको हत्या भएको छ । धान कुट्नको लागि बोकेर मिलमा गइरहेको बेला स्थानीय बोर्डिङका प्रधानाध्यापकसमेत रहेका यम बहादुर गुरुङलाई गाउँकै भिमसेन बुढाथोकीले खुँडा प्रहार गरेका थिए ।

दुवै हात र खुट्टामा लगातार प्रहार गरेर छिया छिया बनाएपछि बुढाथोकी भागेका थिए । खुडाँ प्रहारबाट गम्भीर घाइते भएका गुरुङलाई हेलिकप्टरबाट उपचारको लागि काठमाडौं लैजाने प्रयास गरेपनि साँझको बेला भएर सम्भव नभएपछि एम्बुलेन्समार्फत जिल्ला अस्पताल धादिङवेशी ल्याउँदै गर्दा बाटोमै मृत्यु भएको हो ।

खुँडा प्रहारबाट गुरुङको दाहिने हात नाडीभन्दा तल पुरै छिनेको अवस्थामा रहेकाले उपचारका लागि ल्याउँदा छिमेकीहरुले टुक्रेको हात प्लाष्टिकको झोलामा राखेर ल्याएका थिए ।

खुँडा प्रहार गर्ने बुढाथोकीलाई स्थानीयको सहयोगमा राती नै समातेर प्रहरीलाइ बुझाइएको छ । उनी भगौडा सेना भएको र विगतमा पनि विभिन्न आपराधिक क्रियाकलापमा सामेल भएको व्यक्ति रहेको स्थानीयले जानकारी दिएका छन् ।