सुर्खेतः कर्णालीमा स्थापना भएका अधिकांश क्वारेन्टाइनमा लापर्बाही भइरहेको छ। क्वारेन्टाइनमा राखिएकाको न निगरानी छ, न त स्वास्थ्य जाँच नै । अझ कतिपय स्थानीय तहले त नमूना परीक्षण नै नगरी क्वारेन्टाइनमा बसेकालाई १४ दिन पुगेको भन्दै धमाधम घर पठाउने गरिरहेका हुन् ।
अधिकांश क्वारेन्टाइन नाम मात्रका छन् ।स्थानीय तहले संचालनमा ल्याएका अधिकांश क्वारेन्टाइनमा औपचारिकताका लागि मात्र मान्छेर राख्ने गरिएको छ । क्वारेन्टाइनमा कम्तिमा १४ दिनसम्म नियमित निगरानीमा राखेर कोरोनाको रिपोर्ट नेगेटिभ आएमात्र घर पठाउनुपर्ने हुन्छ । तर अधिकांश स्थानीय तहले नमूना परीक्षण नै नगरी घर पठाइरहेका छन् । यसले गाउँमा थप कोरोनाको त्रास बढ्दो छ ।
सुर्खेतको बराहताल गाउँपालिकाले जनज्योति मावि बड्डीचौरमा क्वारेन्टाइन निर्माण गरेको छ । बाहिरबाट भित्रिएकालाई त्यही क्वारेन्टाइनमा राखिन्छ । तर क्वारेन्टाइनमा बसेका साँझ र बिहान मात्र त्यहाँ भेटिन्छन् ।
दिउँसोमा उनीहरु खेतबारीको काम गर्छन् । सामाजिक दुरी कायम नगरी सहजै रुपमा परिवार र आफन्तको सम्पर्कमा जान्छन् ।स्थानीय डम्बर गरंजाले भने, 'कुनै निगरानी छैन, स्वास्थ्य जाँच पनि हुन्न । मान्छेहरुलाई १४ दिनसम्म त राखिन्छ, तर नमूना परीक्षण नै नगरी घर पठाउने गरिएको छ ।'
क्वारेन्टाइनमा राखिएका लागि परीक्षणबिना घर पठाउने कामले जोखिम बढ्ने उनको भनाइ छ । जाजरकोटको भेरी नगरपालिका-१ पिपेका हरिबहादुर पुनसाँझ र विहान क्वारेन्टाइनको खाना खान्छन् । दिनभरी भने खेतबारीमै व्यस्त हुन्छन् । अरु सात जनाको दैनिकी पनि उस्तै छ ।
क्वारेन्टाइनमा राखिए पनि उनीहरु गाउँघरमा निर्धक्क डुल्छन् । क्वारेन्टाइनमा खाना खुवाउने र सुताउने काम बाहेक स्थानीय तहले कुनै निगरानी र स्वास्थ्य जाँच नगरेको स्थानीयको गुनासो छ । क्वारेन्टाइनमा राख्नुको मुख्य उदेश्य उनीहरुमा कोरोना संक्रमण भएको अवस्थामा अरुमा संक्रमण नहोस् भन्ने हो ।
कम्तिमा १४ दिनसम्म स्वास्थ्यकर्मीको निगरानीमा बस्ने र नमूना परीक्षण गर्दा कोरोना नदेखिएमा मात्र त्यहाँबाट विदा हुनुपर्ने हो ।तर कर्णालीका क्वारेन्टाइनमा देखाउनका लागि मात्र मानिसलाई राखिएको छ ।
अधिकांश स्थानीय तहले १४ दिनसम्म क्वारेन्टाइनमा खाना खुवाउने र सुताउने काम मात्र गरेका छन् ।तर उनीहरुलाई नमूना परीक्षण नै नगरी घर पठाउने गरिएको हो । परीक्षण नहुँदा उनीहरुमा कोरोना भए नभएकोबारे कुनै जानकारीछैन ।
यसले गाउँमा जोखिम थप बढेको भन्दै चिकित्सकहरुले चिन्ता व्यक्त गरेका छन् ।प्रदेश सरकारले भने किटको अभावले नमुना परीक्षण गर्न नसकिएको जनाएको छ । अनुमान गरिएकोभन्दा धेरै नागरिक भित्रिएकाले थेग्नै नसकिएको प्रदेश सरकारको भनाइ छ ।
क्वारेन्टाइनको क्षमता थोरै हुँदा उद्दार गरिएका सबैलाई क्वारेन्टाइनमा मापदण्ड अनुसार व्यवस्थापन गर्न नसकिएको भूमि व्यवस्था, कृषि तथा सहकारी मन्त्री विमला केसीले बनाइन् । ‘नमूना परीक्षण र र्यापिड टेष्ट गर्ने दुबै किट अभाव भयो,' उनले थपिन्, 'किन्न चाहेर पनि किट पाएका छैनौं, यसले अवस्था केही असहज भएको हो ।'
प्रतिक्रिया दिनुहोस !
