१०१ वर्षमा सत्यमाेहन

काठमाडौं : शताब्दी पुरुष सत्यमोहन जोशी मंगलबार १०१ वर्ष पुगेका छन् । १९७७ साल वैशाख ३० गते बखुम्बहाल, ललितपुरमा जन्मिएका  संस्कृतिविद् जोशीले मंगलबार १०१ औं जन्मदिन मनाएका हुन् । 

गतवर्ष  ललितपुर महानगरपालिकाले एक वर्षभर विभिन्न कार्यक्रम गरी जोशीको जन्मशताब्दी मनाएको थियो । कोरोना कहरका कारण देशभर लकडाउन भएकाले उनको जन्मोत्सवमा सार्वजनिक कार्यक्रम भएन । 

त्रिचन्द्र कलेजबाट स्नातकसम्म अध्ययन गरेका जोशी २०१५ सालमा पुरातत्व र संस्कृति विभागका पहिलो निर्देशक नियुक्त भएका थिए । 

उनका १० वटा प्रबन्ध तथा अनुसन्धानात्मक कृति, पाँच पाँचवटा नाटक र कथा संग्रह, दुईवटा काव्य तथा नेवारी भाषामा विविध विधाका पुस्तक गरी करिब ५० कृति प्रकाशित भइसकेका छन् । जोशी तीन पटक मदन पुरस्कार पाउने एक मात्र साहित्यकार हुन् । तस्बिर : सुनिता डंगोल