सुर्खेतः भारतबाट नेपालको सीमा नाकासम्म आइपुगेका कर्णालीबासीको उद्दार गरिने भएको छ । प्रदेश सरकारले नाकासम्म आएका कर्णालीबासीको उद्दार गर्ने तयारी गरेको छ ।
यद्यपि उनीहरुको अनिवार्य आरडिटी परीक्षण गरेर मात्र प्रदेशभित्र प्रवेश गराइने छ । कर्णालीबाट रोजगारीका लागि करिव ८० हजार नागरिक भारतमा रहेको अनुमान गरिएको छ । त्यसमध्ये करिव २० हजार नागरिक तत्काल फर्किने आंकलन प्रदेश सरकारले गरेको छ ।
उनीहरुको उद्धारका लागि आवश्यक तयारी भइरहेको प्रदेश सरकारले जनाएको हो । भारतले रेल सेवा सञ्चालन गरेसँगै अधिकांश कर्णालीबासी नेपाल–भारत सीमामा आउन थालेपछि प्रदेश सरकारले उद्धार गर्ने तयारी गरेको हो ।
शुक्रबारसम्म नेपालगंज नाकामा करिव ६ सय कर्णालीबासी आइसकेको तथ्यांक प्रदेश सरकारसँग छ । यस्तै कञ्चनपुरस्थित गड्डाचौकी नाकामा पनि कर्णालीबासी आउनेक्रम बढेको छ । भारतबाट नागरिकहरु नाकासम्म आउनेक्रम बढेपछि शुक्रबार सम्पन्न कर्णाली प्रदेश विपद् व्यवस्थापन केन्द्रको बैठकले भारतबाट नाकासम्म आउने सबै कर्णालीबासीलाई उद्दार गर्ने निर्णय गरेको हो । सीमामा आएका नागरिकलाई नेपालगञ्ज र बबईमा अनिवार्य आरडीटी परीक्षणपछि मात्रै उद्धार गरिने आन्तरिक मामिला तथा कानून मन्त्री नरेश भण्डारीले जानकारी दिए ।
‘विगतभन्दा अब कर्णालीमा कोरोना संक्रमणको खतरा बढेको छ, विगतमा स्वदेश र केही भारतबाट आएकाहरुबाट खासै जोखिम थिएन, अब नयाँ आउनेबाट उच्च जोखिम छ । सरकारले जोखिमसँग जुध्नेगरी योजना बनाएर काम सुरु गरेको,’ मन्त्री भण्डारीले भने ।
भारतबाट आएकाहरुलाई प्रदेशको सीमा बबइमा परीक्षण गर्न थप डाक्टरसहितको टोली खटाउने गृहकार्य सरकारले गरेको छ । यस्तै बबइमा क्वारेन्टाइनमा राखिनेछ । आरडिटी परीक्षण नेगेटिभ आएमात्र उनीहरुलाई प्रदेशमा प्रवेश गराएर सम्बन्धित स्थानीय तहको जिम्मा लगाइने छ ।
यदी परीक्षण पोजिटिभ आएको खण्डमा पनि उपचार गरिनेछ । विगतको अनुभवबाट पाठ सिक्दै अब क्वारेन्टाइनको बसाइमा कडाइ गर्ने र अपुग भएका स्थानमा क्वारेन्टाइन निर्माण गर्न पनि पालिकाहरुलाई प्रदेश विपद् व्यवस्थापन केन्द्रले निर्देशन दिएको छ ।
यस्तै बैठकले कर्णाली भित्रने मालवाहक सवारी साधनलाई २४ घण्टासम्म बबइ नाकामा रोक्ने निर्णय गरेको छ । सामग्रीमा कोरोना भाइरस हुनसक्ने भन्दै अनिवार्य नाकामा सवारी रोक्न जिल्ला विपद् व्यवस्थापन केन्द्रलाई बैठकले निर्देशन दिएको छ । खाद्यान्न र निर्माण सामग्री आवतजावतमा खुकुलो गरेको सरकारलाई बबईमा सवारी राक्दा कोरोना भाइरस नष्ट हुने भएकाले रोक्ने व्यवस्था गर्न चिकित्सकले सुझाएका थिए ।
प्रतिक्रिया दिनुहोस !
