बेइजिङ : चीनको तेह्रौं राष्ट्रिय जनकंग्रेसको तेस्रो सम्मेलन मे महिनाको २२ तारिखबाट पइचिङमा शुरु हुने भएको छ । यसैगरी चिनियाँ राजनीतिक परामर्शदातृ सम्मेलन मे २१ बाट आयोजना हुँदै छ । मार्च महिना चीनका लागि दुईवटा महत्वपूर्ण अधिवेशनको अवधि मानिन्छ । यो समयमा राष्ट्रिय जनकंग्रेस (एनपीसी) र चिनियाँ जन राजनीतिक परामर्शदातृ सम्मेलन (सीपीपीसीसी) को वार्षिक बैठक बेइजिङमा आयोजना हुने गर्दछन् । यो चीनले एक वर्षका लागि गरिने कार्य योजना मात्रै नभई विश्वका लागि चीन सम्बन्धमा अवलोकन गर्ने महत्वपूर्ण झ्याल पनि हो । तर कोविड–१९ महामारीका कारण यसपटक यी दुई सम्मेलन पछि धकेलिएको हो ।
यी दुई महत्त्वपूर्ण अधिवेशनमा गत आर्थिक वर्षको वार्षिक कार्य प्रतिवेदन समीक्षा, आर्थिक तथा सामाजिक विकास योजनाको समीक्षा र केन्द्रीय तथा स्थानीय बजेटको समीक्षा गरिनुका साथै आगामी आर्थिक वर्षका लागि वार्षिक कार्ययोजना तथा बजेट पारित गरिन्छ । चीनको राजनीतिक मामिलाको मन्थन, समीक्षा, बहस, योजना र नीति तर्जुमाको यो सम्मेलनको कार्य प्रभावले चीन र आम चिनियाँ जनतालाई मात्रै नभई छिमेकी मुलुक र विश्वलाई समेत प्रत्यक्ष–प्ररोक्ष प्रभावित पार्ने गर्दछ । दोस्रो आर्थिक शक्ति राष्ट्र चीनका नीतिगत पहल र सामरिक तथा रणनीतिक कदमतर्फ विश्वको ध्यान खिचिनु स्वभाविकै हो ।
यस वर्षको दुई अधिवेशनमा हाल सामना गरिरहेको कोविड–१९ महामारी र यसले निम्त्याएका चुनौती निस्तेज पार्ने प्रमुख विषय बन्नेछ । यस बाहेक, यस वर्ष चीनको गरिबी उन्मूलीकरणको अन्तिम वर्ष हो, धेरै हदसम्म सफल भइसकेको चीनले गरिबी निवारणको लक्ष्य हासिल गर्ने बाटोमा रहेका केही अवरोध पन्छाउने तयारी गर्नेछ । साथै यी सम्मेलनले कोविड–१९ ले निम्त्याएको रोजगार समस्या, वैदेशिक व्यापार तथा वैदेशिक लगानी, र चीन अमेरिकाबीच जारी व्यापार युद्धका बारेमा आगामी दिनमा अगाडि बढ्नलाई मार्ग प्रशस्त गर्नेछ । यसैगरी यस वर्ष चीनको तेह्रौं पञ्चवर्षीय (२०१६–२०२०) योजनाको अन्तिम वर्ष हो । यस सम्बन्धमा पनि लेखाजोखा हुनेछ । साथै विश्वव्यापीकरण र नवीन रेशममार्ग अर्थात् बेल्ट एण्ड रोड इनिसिएटिभलगायत, अन्तरीक्ष अन्वेषण र नवप्रविधिको खोज तथा अनुसन्धानका विषय पनि मुख्य मुद्दा हुनेछन् ।
यस पटकको दुई अधिवेशन महामारी नियन्त्रणका लागि इन्टरनेटको माध्यमबाट समेत हुने जनाइएको छ । राष्ट्रिय जनकंग्रेस समितिको विदेश मामिला परिषद्का प्रखुम चाङ ये स्वीका अनुसार हाल विदेशमा कोविड महामारीको पैmलावट जारी रहेको तथा प्रभावकारी रूपमा नियन्त्रणमा नआएको अवस्थामा विदेशबाट संक्रमित केस भित्रिने र स्वदेशमा पनि पुनः फैलिने सम्भावना रहेकाले नियन्त्रण गर्नका लागि चीनले यस वर्षको सम्मेलनलाई केही समायोजन गरेको छ ।
सम्मेलनको समयावधिलाई छोटो बनाउँदै मुख्य एजेण्डा तथा मिति सम्मेलनअघि आयोजना हुने तयारी बैठक र अध्यक्ष टोलीको पहिलो बैठकद्वारा पारित गरिने पनि जनाइएको छ । प्रेस सम्मेलन, पत्रकार सम्मेलनलगायतका कार्यक्रमलाई भिडियोमार्फत् आयोजना गरिने भएको छ । सम्मेलनको पूर्ण बैठकमा भने चीनका लागि विभिन्न मुलुकका राजदूतलाई सहभागी हुन र पइचिङमा रहेका केही चिनियाँ तथा विदेशी पत्रकारलाई जनबृहत् सभाभवनमा अन्तर्वार्ताका लागि निमन्त्रण गर्ने बताइएको छ ।
चिनियाँ राष्ट्रपति सी चिनफिङसहित सरकारका नेताहरू गरी ३ हजारभन्दा बढी राष्ट्रिय जनकंग्रेसका प्रतिनिधिहरू तेह्रौं राष्ट्रिय जनकंग्रेस अधिवेशनको तेस्रो सम्मेलनमा सहभागी हुनेछन् । यसैगरी चिनियाँ जनराजनीतिक परामर्शदातृ सम्मेलन तेह्रौं राष्ट्रिय समितिको तेस्रो अधिवेशनमा दुई हजारभन्दा बढी सदस्यले चीनको समग्र विकास सम्बन्धमा छलफल गर्ने छन् ।
कोविड–१९ को महामारीको रोकथाम तथा नियन्त्रण नै देशको पहिलो प्राथमिकता भएका कारण फेब्रुअरी २४ तारिखमा दुई अधिवेशन पछि सार्ने निर्णय गरिएको थियो । सन् १९९५ देखि मार्चको प्रारम्भमा गरिँदै आएका यी दुई अधिवेशन पहिलोपल्ट कोविड–१९ का कारण पछि सारेको हो ।
प्रतिक्रिया दिनुहोस !
