३१ घण्टापछि शव व्यवस्थापन : परिवार भन्छन्, अन्तिम संस्कार गर्न पाएनौं

बुटवल : गुल्मीका कोरोना संक्रमित ४१ वर्षिया पुरुषको शव मृत्यु भएको ३१ घण्टापछि व्यवस्थापन भएको छ । शव व्यवस्थापन भए पनि आफन्तले अन्तिम संस्कार गर्न नदिइएको जनाएका छन् ।

शव व्यवस्थापन भएपछि परिवारका सदस्यले अन्तिम संस्कारमा सहभाागि नबनाइएको भन्दै आपत्ती जनाएका छन् । ‘दाइको शव उठाउन प्रहरीको टोली आयो, मैले हिन्दु संस्कार अनुसार गरौं भने तर राज्यका सामू हाम्रो केही चलेन, उनले अन्नपूर्णसंग भने ।

प्रहरीले शव लगेपछि आफूले शव बुझेको कागजमा हस्ताक्षर गरेको उनले बताए । ‘कोरोना लागेको व्यक्तिलाई विद्युतीय शवदाहमा लैजानुपर्ने रहेछ । हाम्रोमा त्यस्तो नभएपछि गाडेछन्, भाईले भने–‘तर गाड्ने भए पनि अन्तिम अवस्थामा हामीलाई टाढैबाट हेर्न दिनुपथ्र्याे ।’ उनले जिउँदो दाइलाई अस्पताल ल्याएर नै गल्ती गरिएको भन्दै निराशा व्यक्त गरे । उपचारमा एक लाख ८० हजार खर्च भए पनि दाइलाई घर लैजान नसकिएकामा उनलाई दुःख छ ।

मृतकसँगै अस्पताल आएका तीन जनामा कोरोना नेगेटिभ देखिएपछि उनीहरु घर फर्किने तयारीमा छन् । घरमै पुगेर काजकिरिया गर्ने उनले बताए । मृतक ४१ वर्षीय शिक्षकका गुल्मीको मदानेमा बुवाआमा, तीन छोरा र श्रीमती छन् ।

मृतकको शव बुटवलको शिवनगर सामुदायिक वन भित्र गाडीएको छ । शव व्यवस्थापनमा सहभागी भएका एक प्रहरी अधिकृतले परिवारकै सहमतिमा शव व्यवस्थापन गरिएको बताए । ‘कोरोनाबाट मृतकको शव व्यवस्थापनमा सबै व्यक्ति सहभागी हुनुभएन, हामीले उहाँहरुले भनेअनुसार नै अनुरुप नै शव व्यवस्थापन गरिदिएका हौं, ती अधिकृतले भने ।

क्रिमसन अस्पतालमा उपचारका क्रममा उनको मृत्यु भएको थियो । मृत्युपछि आफन्तले अस्पतालले उपचारमा लार्पबाही गरेको बताइरहेका छन् । छानबिन गर्नुपर्ने आफन्तको माग र कसले व्यवस्थापन गर्ने भन्नेमा मतभेद हुँदा शव डेढ दिनसम्म अस्पतालकै बेडमा रहेको थियो । सरकारको कार्यविधि अनुसार कोरोना पोजेटिभको मृत्यु भएमा प्रशासनले शव व्यवस्थापन गर्नुपर्ने हुन्छ । कार्यविधिमा शव व्यवस्थापन तत्काल गर्नुपर्ने उल्लेख छ ।

मृतकका आफन्तले उनमा कोरोना नै नभएको समेत दाबी गरेका छन् । उनीसँग सम्पर्कमा आएका तीनजना आफन्त र ३५ जना चिकित्सकको कोरोना परीक्षण नेगेटिभ आएको छ । ‘उहासँग सँगै आएकामा कोरोना छैन, भाइले भने, ‘दाइमा कोरोना छ भन्ने नै गलत हो । त्यही कोरोना देखिएकै भनेर हामीले दाइलाई गुमायौं ।’