रोल्पामाआगलागीबाट दुई घर नष्ट : एकजना घाइते, १३ पशु जले
जेठ ११, २०७७ आइतबार १८:२३:०
रोल्पा : रोल्पा नगरपालिका–१ हरिगातिनामा आगालागीबाट दुई घर जलेर नष्ट भएको छ । आगोमा जलेर एक ज्येष्ठ नागरिक घाइते भएका छन् भने १३ पशु चौपायको मृत्यु भएको छ ।
आइतबार दिउँसो घरमा आगलागी हुँदा ६२ वर्षीय जीतबहादुर बुढा जलेर घाइते भएका हुन् । जिल्ला प्रहरी प्रमुख प्रहरी नायव उपरीक्षक चित्रबहादुर गुरुङका अनुसार बुढाको हात, खुट्टा र शरीरका विभिन्न भागमा जलेर घाइते अवस्थामा उद्दार गरिएको छ । उनलाई उपचारका लागि रोल्पा अस्पताल रेउघा पुर्याइएको छ । दृष्टिमा केही कमजोर रहेका बुढा भाग्न नसक्दा जलेर घाइते बनेको प्रहरीको अनुमान छ ।
जंगलमा लागेको आगोले घर जलाएको बताइएको छ । जीतबहादुर र नेत्रबहादुर बुढाको दुई घर जलेको प्रहरीले जनाएको छ । उनीहरु बाबुछोरा हुन् । आगलागीमा परेर गोरु २, गाई १ र बाख्रा १० वटा जलेर मरेका छन् । घरभित्रका लत्ताकपडा, अन्नपात, भाँडाकुडा सबै जलेर नष्ट भएका छन् ।
जंगलमा आगो नियन्त्रणका लागि गाउँले, खड्क दलका नेपाली सेना, सशस्त्र र जनपद प्रहरी खटिएका छन् । प्रनाउ गुरुङका अनुसार घरमा लागेको आगो नियन्त्रणमा आएको छ । जंगलमा कसरी आगो लाग्यो भन्ने खुलेको छैन ।
प्रतिक्रिया दिनुहोस !
७
