भारतीय श्रमिकबाट कोरोना भित्रियो : मुख्यमन्त्री पोखरेल
जेठ १३, २०७७ मंगलबार १४:३८:०
बुटवल : ५ नम्बर प्रदेशका मुख्यमन्त्री शंकर पोखरेलले भारतबाट श्रमिकको आवागमन बढेकाले प्रदेशमा संक्रमितको संख्या थपिएको बताएका छन् । प्रदेशसभाको बैठकमा कोरोनाको तयारीको विषयमा जानकारी दिँदै पोखरेलले भारतले क्वारेन्टाइनमा राख्ने काम नगरेपछि संक्रमण फैलिएको बताए ।
‘भारतले नेपाल आउन चाहनेलाई सीमामा ल्याएर छाडिदिने गरेको छ । कमजोर सीमा क्षेत्रमा छाडिदिँदा भित्रिने क्रम बढ्यो । भारतले क्वारेन्टाइनमा राख्न नसकेपछि सीमामै राख्न उपयुक्त नभएर नेपाल भित्रिएका छन्’, उनले भने ।
मुख्यमन्त्री पोखरेलले संक्रमण बढ्दै जादा त्यस अनुरुपको तयारी सरकारले गरिरहेको जानकारी दिए । ‘नेपालकै ५० प्रतिशत क्षमताको क्वारेन्टाइन प्रदेश ५ मा बनाएका छौं । नेपालभरको आधा संख्या हामीले राखेका छौं । प्रदेशले काम गरेकै कारण ठूलो संख्यामा क्वारेन्टाइनमा राख्न सकेका हौं, उनले भने ।
प्रदेशमा तीन वटा प्रयोगशालाले निरन्तर परीक्षणको काम गरेका छन् । परीक्षण गर्ने संख्या धेरै भएकाले भिटिएम फ्रिजमा राख्नुपर्ने अवस्था आएको मुख्यमन्त्रीले जानकारी दिए । यस्तो अवस्था भारतबाट आउनेकै कारण भएको उनको भनाइ छ । संख्या बढ्दै जादा स्वभाविक रुपमा जटिलता उत्पन्न भएको संसदलाई जानकारी गराए ।
‘सामाथ्र्य निर्माणमा हामी अरुभन्दा पछाडि छौं भन्ने सत्य होइन । तर चुनौति थपिदै गएको छ । जटिलता झन बढेको छ’, उनले भने ।
चार कोरोना विशेष अस्पताललाई लक्षण देखिएका बिरामी राख्ने र हरेक जिल्लामा आइसोलसन बनाएर संक्रमित राख्ने योजना रहेको उनले बताए । तराईमा २ सय बेड र पहाडी जिल्लामा ५० बेडको आइसोलेसन बनाउन निर्देशन दिएको उनले बताए । त्यसका लागि बजेट समेत पठाइएको उनको भनाइ छ । प्रदेशमा १५ सय जनाको उपचार गर्न सक्ने योजनासहित अघि बढेको उनले जानकारी दिए ।
कोरोनाको तयारीमा जुट्नका लागि प्रदेश सरकारले बजेट स्थानीय तहमा पठाएको मुख्यमन्त्रीले बताए । आइसोलेसनका लागि तराईमा २० लाख र पहाडमा १० लाखका दरले जिल्लामा बजेट बिनियोजन गरिएको उनले जानकारी गराए । हरेक पालिका र तीन वटै सुरक्षा निकायलाई समेत बजेट दिइएको छ । मुख्यमन्त्रीले तीन सुरक्षा निकायलाई ५÷५ लाख रकम दिइएको जानकारी दिए ।
संक्रमितको संख्या थपिदै जाँदा जटिलता उत्पन्न हुदै जाने उनले बताएका छन् । भारतबाट ठूलो मात्रामा नेपाल आउनेको संख्या बढ्दै जाने सम्भावना रहेकाले चुनौति थपिदै जाने उनको भनाई छ । भारतबाट आउने संख्या थपिदा तयारी बढाउदै लैजानुपर्ने आवश्यकता रहेको उनले बताए । मुख्यमन्त्रीले सरकारले गरेका निर्णय कार्यान्वयनमा सहयोग गरिदिन सांसदलाई आग्रह समेत गरे ।
भन्सार क्षेत्रमा ‘होल्डिङ क्वारेन्टाइन’ बनाउने निर्देशन जिल्लामा पुगिसकेको मुख्यमन्त्रीले बताए । त्यसरी बनेका क्वारेन्टाइनमा भारतबाट आउनेलाई केही दिनमात्रै राख्ने र त्यहाबाट सम्बन्धीत पालिकामा पठाउने योजना रहेको छ । जिल्लामा गठित संकट व्यवस्थापन समितिले त्यो निर्माणको काम सुरु गरिसकेको मुख्यमन्त्रीको भनाइ छ ।
संक्रमित समाजमा पुगेरै फैलिएको घटना नरहेको भन्दै उनले अहिलेको अवस्थालाई नियन्त्रण गर्न सकिने बताए । मुख्यमन्त्री पोखरेलले आगामी बजेट कोरोना नियन्त्रणमा केन्द्रीत रहेर आउने बताए । श्रम गर्न नसक्नेलाई राहत र श्रम गर्नेलाई रोजगारी दिने योजना रहेको उनले बताए । भारतबाट आउने श्रमिकलाई नेपालकै उद्यममा लगाउन चालु आर्थिक वर्षमै २१ करोड बजेट बिनियोजन गरिएको उनले जानकारी दिए । आगामी बजेटलाई समेत सोही ढाचामा ढाल्ने नीति कार्यक्रम रहेको उनले बताए ।
प्रतिक्रिया दिनुहोस !
