टीकापुर : कैलालीको जानकी गाउँपालिकामा थप एकजना ३८ वर्षीय पुरुषमा कोराना पुष्टि भएको छ । गाउँपालिका १ मा रहेको सरस्वती माध्यमिक विद्यालयको क्वारेन्टाइनमा रहेका ती पुरुषमा कोरोना पुष्टि भएको हो ।
यसअघि सो क्वारेन्टाइनमा बसेका तीनजना पुरुषमा कोरोना संक्रमण पुष्टि थियो ।यससँगै जानकी गाउँपालिकामा कोरोना संक्रमितको संख्या ४ पुगेको छ । जानकी गाउँपालिकाका स्वास्थ्य शाखा प्रमुख जीतबहादुर चौधरीका अनुसार कोरोना पुष्टि हुनेमा जानकी गाउँपालिका ३ भगतपुरका पुरुष हुन् । उनी भारतको बारबंकीबाट नेपाल आएका हुन् ।
चौधरीका अनुसार बारबंकीबाट भारतकै नानपारा क्वारेन्टाइनमा तीन दिन बसेका उनी रुपडियाँ नाका हुँदै आएका हुन् । उनी जेठ २ गते राति टीकापुर नगरपालिका ७ सत्तीस्थित कर्णाली माध्यमिक विद्यालयको क्वारेन्टाइनमा बसेका थिए । जेठ ३ गते उनलाई सरस्वती माविको क्वारेन्टाइनमा लगिएको थियो ।
सो क्वारेन्टाइनमा रहेका १६ जनाको टीकापुर अस्पतालका स्वास्थ्यकर्मीको टिमले थ्रोट स्वाब संकलन गरेको थियो । यसअघि तीन जना र आज एक गरी ४ जनामा कोरोना पुष्टि भए पनि अन्यको रिपोर्ट नआएको चौधरीले बताए ।
'१६ जनाको स्वाब संकलन भएको थियो, ४ जनाको रिपोर्ट पोजिटिभ आएको छ,' चौधरी भने, 'अन्यको रिपोर्ट भने आएको छैन।' सो क्वारेन्टाइनमा ४२ जना राखिएका छन् ।
यसअघि जानकी गाउँपालिका ७ का दुई जना र कञ्चनपुर ४ का एक जनामा कोरोना पुष्टि भएको थियो । उनीहरुलाई टीकापुर अस्पतालको आइसोलेसनमा राखिएको छ ।
किट नहुँदा स्वाब संकलनमा ढिलाइ
भिटिएम किट नहुँदा जानकी गाउँपालिकाका दुई जना कोरोना संक्रमितको सम्पर्कमा रहेकाको स्वाब संकलन हुन सकेको छैन । वडा नं. ७ मोतिनगरका कोरोना संक्रमित पुरुषको सम्पर्कमा रहेका १५ जना र वडा नं. ४ का संक्रमितको सम्पर्कमा रहेका ६ जनाको स्वाब संकलन हुन नसकेको हो ।
बाँकेको नेपालगञ्जबाट एम्बुलेन्समार्फत् घर पुगेका मोतिनगरका पुरुष तीन दिनसम्म घरमा बसेका थिए । गाउँमा भलिबल समेत खेलेका उनको कन्ट्याक्ट टेसिंङमा आएकाहरुको घर नै सिल गरिएको छ स्वास्थ्य शाखा प्रमुख चौधरीले जानकारी दिए ।
संक्रमण पुष्टि भएको पाँच दिनसम्म समेत कन्ट्याक्ट टेसिंङमा रहेकाहरुको स्वाब समेत संकलन नभएपछि उनीहरु त्रसित बनेका छन् । चौधरीले सुदूरपश्चिम प्रदेशबाट गाउँपालिकालाई भिटिएम कीट नपठाएका कारण स्वाब संकलन गर्न नसकिएको बताए । सुदूरपश्चिममा भिटिएम किट नहुँदा कोरोना परीक्षण कार्य समेत प्रभावित भएको छ ।
प्रतिक्रिया दिनुहोस !
