संक्रमितको सम्पर्कमा आएका १४ सेना र ६ स्वास्थ्यकर्मी क्वारेन्टाइनमा

दोलखा : सदरमुकाम नजिकै भीमेश्वर नगरपालिका–२, तिखातलका ७६ वर्षीय वृद्धमा कोरोना संक्रमण पुष्टि भएपछि उनीसँग सम्पर्क भएका सेना र उपचारमा संलग्न स्वास्थ्यकर्मीलाई क्वारेन्टाइनमा राखिएको छ ।

    
जिल्लामा संक्रमितको उपचारमा संलग्न ६ स्वास्थ्यकर्मी र घरमा बास बसेका नेपाली सेनाका एक जवान र उनको पनि सम्पर्कमा रहेका अन्य १३ सेनासहित २० जनालाई क्वारेन्टाइनमा राखिएको हो । दोलखास्थित धुलिखेल अस्पतालमा गत शनिबार राती संक्रमितको उपचारमा संलग्न रहेका ६ स्वास्थ्यकर्मीलाई अस्पताले नै क्वारेन्टाइनमा राखेको जनाएको छ । उनीहरुको बिहीबार पीसीआर परीक्षणका लागि र्‍याल संकलन गरेर पठाइने तयारी गरिएको छ ।
    
उनका बुहारीका सैनिक सेवामा कार्यरत भाइ घर बिदामा आएको बेलामा एकरात संक्रमित रहेकै घरमा बास बसेको कारण सैनिकलाई तारा दल गण चरिकोटमा क्वारेन्टाइनमा राखिएको छ । केही दिनदेखि उनीसँगै क्वारेन्टाइनमा रहेका अन्य १३ जनालाई पनि ब्यारेकभित्रै क्वारेन्टाइमा राखिएको तारा दल गण चरिकोटका गणपति निखिल कुँवरले जानकारी दिए ।
    
नेपाली सेनाको भोजपुरस्थित गणमा कार्यरत ती सैनिक जवानलाई जेठ १० तारा दल गणमा हाजिर भएकै दिनदेखि नै क्वारेन्टाइनमा राखिएको थियो । संक्रमितको घरमा बास बसेका सैनिक र उनीसँगै ब्यारेकमा क्वारेन्टाइनमा बसेका अन्य १३ सहित १४ सैनिकको शुक्रबार पीसीआर परीक्षणका लागि र्‍याल संकलन गरेर पठाइने गणपति कुँवरले जानकारी दिए ।