जाजरकोट : पश्चिम रुकुमको चौरजहारी ८ सोतीमा भएको घटनामा संलग्नलाई कडा कारवाहीको माग गर्दै जाजरकोटका युवाहरुले शनिबार सदरमुकाम खलंगामा प्रदर्शन गरेका छन् ।
‘हामीलाई न्याय चाहियो । हत्यारालाई हदै सम्मको कारवाही होस्’ लगायत नारा लेखिएका ‘प्लेकार्ड‘ बोकेर युवाहरुले खवरदारी गरेका हुन् । स्थानीय युवाहरुले स्वतस्फुर्त रुपमा सदरमुकाको खलंगास्थित ठाटीबजारमा जम्मा भएर हातमा प्लेकार्ड सहित नाराबाजी गर्दै गैरी खाली हुँदै बजार परिक्रमा गरेका थिए ।
उनीहरुले घटनाका दोषीहरुको तत्काल छानविन गरी हदैसम्मको कारवाही हुनुपर्ने, घाइतेको उचित उपचार प्रवन्ध मिलाउनु पर्ने, बेपत्ताको खोजी तत्काल गर्नु पर्ने लगायत माग राखेका छन् । घटनालाई तोडमोड गरी अपराधी उम्काउने चलखेल हुन थालेको भन्दै आफुहरुले न्यायका लागि दवाव दिन प्रदर्शन गरेको स्थानीय रणबहादुर कार्कीले बताए ।
‘जातीय विभेदकै कारण गराइएको यो घटना जघन्य र वर्वर छ । यसमा संलग्न जो कोही पनि छुट्नु हुँदैन । घटनाको निष्पक्ष छानविन हुनुपर्छ,’ कार्कीले भने । कथित उपल्लो जातकी प्रेमिकालाई बिहे गर्ने भन्दै रुकुम पुगेका जाजरकोटका नवराज बिक सहित पाँच जनाको हत्या हुनुका साथै भेरी गरपालिका ११ का गोविन्द शाही अझै बेपत्ता छन् ।
प्रतिक्रिया दिनुहोस !
