काठमाडौं : कोरोना महामारीका कारण लकडाउनको अवस्थामा पुस्तक लोकार्पण लगायतका औपचारिक कार्यक्रम सम्भव नभएपछि आयोजकले अनलाइन भर्सनबाट लोकार्पण कार्यक्रम गरिरहेका छन्।
यसैक्रममा शनिबार चार भाषाको २० बाल पुस्तकको अनलाइन भर्सनबाट लोकार्पण गरिएको छ। लोकार्पित पुस्तकमा छविलाल कोपिलाको कैलारी र स्यालको बिहे, कृष्णराज सर्वहारीको भुख्ली र खुत्रुके तथा शान्ति चौधरीको लहेडा र बछिया अनि मेरी दुधु रहेका छन्। रंगीन सचित्रमय यी ६ वटै पुस्तक डंगौरा थारू, नेपाली र अंग्रेजी भाषामा प्रकाशित गरिएका हुन्।
यसका अतिरिक्त शान्ति चौधरीका दुवै पुस्तक बारा जिल्लाको थारू भाषामा पनि प्रकाशित छ। शान्तिले यसअघि नै ६५ वटा पुस्तक प्रकाशित गरिसकेकी छन्।
सिर्जनालयसँगको सहकार्यमा द एसिया फाउन्डेसनको लेट्स रिड परियोजनाले उक्त बालकथा प्रकाशन गरेको हो। पुस्तकको लोकार्पण द एसिया फाउन्डेसनका कन्ट्री डाइरेक्टर मेघन नाल्बो, बुक्स फर एसियाकी रीतिका लाकौल, सिर्जनालयका अध्यक्ष सरारे वज्राचार्य, पुस्तकका सम्पादक मुना गुरुङ तथा पुस्तकका लेखक र चित्रकारले संयुक्त रूपमा गरेका थिए।
सो अवसरमा द एसिया फाउन्डेसनका कन्ट्री डाइरेक्टर मेघन नाल्बोले बुक्स फर एसिया परियोजनाअन्तर्गत एसियाका २९ भाषाका करिब तीन हजार पुस्तक तयार गरी लेट्स रिड डिजिटल लाइबे्ररीमा अपलोड गरिएको जानकारी गराइन्। अपलोड सबै बालकथा केन्द्रित रहेका केही पुस्तक प्रकाशित पनि गरिएका छन्। नेपालअन्तर्गत नेपाली, नेपाल तथा थारू भाषामा तीन सय ५० बालपुस्तक तयार गरिएको पनि नाल्बोले बताइन्।
कार्यक्रममा कृष्णराज सर्वहारीले थारू भाषामा भुख्ली, छविलाले कोपिलाले नेपाली भाषामा स्यालको बिहे तथा सरारे वज्राचार्यले अंग्रेजी भाषामा कैलारी कथा वाचनसमेत गरेका थिए। कोपिलाले थारू बालसाहित्यलाई समृद्धिको बाटोमा डो¥याउन विभिन्न भाषामा अनुवादसमेत गरिएका यी पुस्तकले मागदर्शन गर्ने बताए।
त्यस्तै, लोकार्पित पुस्तकमा चित्र बनाउने मित्थु थारु, बन्दना तुलाचन, उमेश चौधरी, उहाबाङ, श्रद्धा श्रेष्ठ, सुमन महर्जनले आआफ्नो कामको अनुभव सेयर गरेका थिए। चित्रमा जीवन्तता ल्याउन दाङ देउखुरीको विभिन्न थारू गाउँहरूको भ्रमणले आफूहरूलाई निकै फलदायी भएको श्रद्धा श्रेष्ठले बताइन्।
आयोजकहरूले यसलाई लोकार्पण कार्यक्रममा मात्र सीमित नराखी बालसाहित्य केन्द्रित एकहप्ते छलफल कार्यक्रम पनि राखेका छन्। शनिबारदेखि आगामी शुक्रबारसम्म आयोजना गरिने कार्यक्रमको नाम कैलारीदेखि बारासम्म राखिएको छ। यस कार्यक्रममा लोकार्पित पुस्तकका लेखक तथा चित्रकारहरूसँग सीता मादेम्बा, प्रनव आकाश, कुमुदिनी, अनुराधा, प्रोमिनालगायतले छलफल चलाउनेछन्। आयोजकका अनुसार अन्तिम दिन शुक्रबार बालसाहित्यको भविष्यबारे प्यानल छलफल राखिएको छ।
प्रतिक्रिया दिनुहोस !
