बुटवल : विकास निर्माणको काम गर्ने 'पिक आवर'मा कोरोना नियन्त्रणका लागि लकडाउन भयो । थुप्रै विकासका योजना अलपत्र परेका छन् ।अझै काम गर्ने सहज वातावरण छैन।
तर, रुपन्देहीका केही योजना भने निरन्तर रुपमा चलिरहेका छन् ।जलस्रोत तथा सिँचाइ विकास डिभिजन कार्यालयमार्फत सञ्चालनमा रहेको ८ वटा ठूला सिँचाइका योजना निर्माण निरन्तर भइरहेका छन् ।
निर्माण सामग्रीको भण्डारण गरेका कम्पनीले काम निरन्तर गरेको डिभिजन प्रमुख टंक केसीले बताए ।संघीय सरकारबाट हस्तान्तरित १२ र प्रदेश सरकारका ६ वटा योजना चालु अवस्थामा रहेका छन् ।
छत्तिस मौजा, खड्वा सिँचाइ, रोहिणी र सियारी सिँचाइ योजनाको काम निरन्तर भइरहेको छ । 'सामग्री रहेका योजनाको काम धमाधम भइरेको छ, डिभिजन प्रमुख केसीले अन्नपूर्णसँग भने, 'साना योजनाको काम हुन सकेको छैन ।'
रुपन्देहीमा सञ्चालित यी योजनाले थप ९ हजार हेक्टरमा सिँचाइ सुविधा पुग्नेछ । ८२ हजार ६ सय २२ हेक्टर खेतीयोग्य जमिनमध्ये ५८ हजार ५ सय ४० हेक्टर सिँचाइ योग्य छ । सिँचाइ सुविधा पुगेको क्षेत्र भने ३७ हजार ६ सय हेक्टरमात्रै छ ।
अन्नभण्डारका रुपमा रहेको सिँचाइलाई विस्तार गर्न प्रदेश सरकारले जोड दिएको छ । प्रदेशका योजनाहरु रुपन्देहीका १० वटा पालिकामा चलिरहेका छन् ।
मर्चवार क्षेत्रमा सिँचाइ सुविधा पुराउने योजनाअनुरुप काम भइरहेको छ । चालु योजनामध्ये १६ मौजा सिँचाइ ३७ करोड लागतको हो । यो नहर ढलानको काम भइरहेको छ । रोहिणीमा ३६ करोडको अर्का योजना चलिरहेको छ । चैतदेखि जेठसम्म विकास निर्माणको 'पिक आवर' मानिन्छ ।
पुरानै रफ्तारमा काम नभएपछि ठप्प नै अवस्था नहरेको प्रमुख केसीले बताए ।अत्यावश्यक पुल बन्दै सडक डिभिजन कार्यालय बुटवलमार्फत करिब ४० वटाको हाराहारीमा पुल निर्माण प्रक्रियामा छन् ।
मोटरेबल पक्की पुल निर्माणको काम लकडाउन यता प्रभावित छ । अत्यावश्यक रहेका १६ वटा पुल निर्माणको काम भने धमाधम भइरहेको छ । सडक डिभिजन प्रमुख मेघराज मरासिनीका अनुसार रुपन्देही, पश्चिम र पूर्वी नवलपरासीमा पुल निर्माणका काम जारी रहेका हुन् ।
बर्खामा नदी आउने भएकाले ती पुलहरुको काम निरन्तर रहेको उनले बताए । मरासिनीका अनुसार लकडाउनकै अवधिमा पूर्वी नवलपरासीमा साढे ३ किलोमिटर कालोपत्रे समेत सकिएको छ ।
बुटवलको प्रदर्शनी केन्द्र र सम्मेलन केन्द्रको काम पनि निरन्तर चलिरहेको छ । लकडाउनकाबीच यस प्रदर्शनी केन्द्रमा ३५ जना मजदुरले काम गरिरहेका छन् ।
एक महिना निर्माण बन्द भएको प्रदर्शनी केन्द्र सहरी विकासबाट अनुमती प्राप्तपछि वैशाख १३ काम सुरु गरिएको हो । मजदुरलाई कामबाट बञ्चित हुन नदिन तथा समयमा काम सक्न भन्दै कोरोना भाइरसविरुद्ध विशेष सावधानी अपनाएर काम भइरहेको अन्र्तराष्ट्रिय प्रदर्शनी केन्द्रका सुपरभाइजर तारा सापकोटाले बताए । मजदुरलाई दूरी कायम गरेर खटाएको छ ।
आयोजनाका इन्जिनियर रेशा बस्यालले लकडाउनको समयमा सबै सामान उपलब्ध नहुँदा 'फुलफेज'को काम भने हुन नसकेको बताइन् । स्थानीय स्रोतसाधनबाट जेजति सामान उपलब्ध हुन्छ त्यसैअनुसार प्रयोग गरेर निर्माणको काम गरिएको उनले बताइन् ।
स्थानीय तहले समेत विकासका काम सुरु गरेका छन् । सडक ग्राभेल, कालोपत्रे, नाली निर्माणका काम भइरहेका छन् । असारअघि नै काम सक्नेगरी काम भइरहेको हो ।
प्रतिक्रिया दिनुहोस !
