भक्तपुर : काठमाडौंको जोरपाटीस्थित नेपाल मेकिडल कलेजमा चिकित्सकमाथि भएको आक्रमणविरुद्ध बुधबार भक्तपुर क्यान्सर अस्पतालका चिकित्सकहरु विरोधमा उत्रिएका छन् । अस्पतालका चिकित्सक तथा स्वास्थ्यकर्मीले हातमा कालोपट्टि बाँधेर बिरामी जाँच्नै छाडेर विरोध प्रदर्शनमा उत्रिएका हुन् ।
मेडिकल अफिसर इन्चार्ज डा. आनन्दबाबु ढकालको नेतृत्वमा अस्पतालका चिकित्सकहरुले करिब एकघन्टा सेवा बन्द गर्दै चिकित्सकमाथि दुर्व्यवहार गर्नेमाथि कारबाही माग गरेका छन् । उनीहरुले चिकित्सकमाथि दुर्व्यवहार गर्नेलाई कानुनी कारबाही नगरिएसम्म हातमा कालोपट्टि बाँधेर सेवा दिने बताएका छन् ।
नेपाल मेडिकल कलेजमा जेठ १४ गते उपचार गराउन ल्याएका एक बिरामीको ज्यान गएको थियो । उक्त घटनामा चिकित्सक दोषी भएको भन्दै बिरामीका आफन्तले हातपात गरेका थिए ।
उक्त घटनाको विरुद्ध प्रदर्शनमा उत्रिएका भक्तपुर क्यान्सर अस्पतालका चिकित्सक तथा स्वास्थ्यकर्मीहरुले ‘चिकित्सकमाथि आक्रमण गर्नेलाई धरौटीविना जेल’, ‘दण्डहीनताको अन्त्य गर’, ‘स्वास्थ्यकर्मीमाथि हुने आक्रमणविरुद्ध ऐन ल्याऊ’लगायत लेखिएको प्लेकार्ड बोकेका थिए । उक्त प्रदर्शनपश्चात पनि चिकित्सक तथा स्वास्थ्यकर्मीहरु हातमा कालोपट्टि बाँधेर काममा खटिएका छन् ।
विश्वमै कोरोना भाइरस संक्रमणको महामारीबीच आफ्नो ज्यानको बाजी राखेर काम गरिरहेका चिकित्सकमाथि दुर्व्यवहार हुनु निन्दनीय भएको मेडिकल अफिसर डा. ढकालले बताए । यसअघि पनि धेरैपटक चिकित्सकहरुमाथि हातपात तथा दुर्व्यवहार हुँदै आए पनि सरकारले दोषीलाई कारबाही नगरिँदा चिकित्सकमाथि आक्रमण तथा दुव्यर्वहार हुन नरोकिएको अस्पतालका सर्जन चिकित्सक डा. उत्सवमान श्रेष्ठले स्पष्ट पारे ।
अहिलेको घटनाका दोषीलाई कारबाही नगरिएसम्म आफूहरुको आन्दोलन जारी रहने अस्पतालका चिकित्सकहरुले चेतावनी दिएका छन् । उनीहरुले सम्पूर्ण स्वास्थ्यकर्मीहरुको सुरक्षाको प्रत्याभूति गर्न सरकार र चिकित्सकसँग सम्बन्धित संघसंगठनहरुसँग माग गरेका छन् ।
चिकित्सकमाथि आक्रमण गर्नेलाई कारबाही माग गर्दै हातमा कालोपट्टि बाँधेर बिरामी जाँच्दै भक्तपुर क्यान्सर अस्पतालका एक चिकित्सक ।
प्रतिक्रिया दिनुहोस !
