भक्तपुरकी कोरोना संक्रमित गर्भवतीको सम्पर्कमा रहेका १० जनाको स्वाब संकलन

भक्तपुर : कोरोना भाइरस संक्रमित भक्तपुरकी ३० वर्षीया गर्भवती महिलाको घरपरिवार र उनको सम्पर्कमा रहेका गरी १० जनाको कोरोना परीक्षण गरिएको छ ।

भक्तपुरको चाँगुनारायण नगरपालिका ३ झौखेल गर्भवती महिलाको घर परिवारका ४ जना र उनको सम्पर्कमा रहेका ६ जना गरी १० जनाको कोरोना परीक्षणका लागि बुधबार स्वाब संकलन गरिएको हो ।

महानगरीय प्रहरी परिसर भक्तपुरका प्रमुख प्रहरी उपरीक्षक सविन प्रधानले स्वायब संकलन गरिएका १० जनामा दुई पुरुष र बाँकी ८ जना महिला रहेको जानकारी दिए ।जिल्ला स्वास्थ्य कार्यालय भक्तपुरका स्वास्थ्यकर्मीले उनीहरुको स्वाब संकलन गरेका हुन् । पीसीआर प्रविधिबाट कोरोना भाइरस परीक्षण गर्न उक्त स्वाब काठमाडौंको टेकुस्थित राष्ट्रिय जनस्वास्थ्य प्रयोगशाला पठाइएको छ।

स्वास्थ्य मन्त्रालयले मंगलबार ती गर्भवती महिलामा कोरोना भाइरस संक्रमण भएको सार्वजनिक गरेको थियो । काठमाडौंको सिनामंगलस्थित काठमाडौं मेडिकल कलेज (केएमसी) शिक्षण अस्पतालमा नियमित स्वास्थ्य जाँच गराउँदै आएकी उनी पछिल्लो पटक जेठ १५ गते अस्पताल पुगेकी थिइन् ।

उनी वैशाख र जेठ दुई महिनामा तीनपटक अस्पताल पुगेको ट्राभल हिस्ट्रीबाट देखिएको छ ।चिकित्सकले उनलाई असारको दोस्रो साता बच्चा जन्मिने मिति दिएको बताइएको छ । 

उनको पेटमा बच्चाको अवस्था सामान्य स्थितिमा नरहेकाले अप्रेसन गरेर बच्चा निकाल्नुपर्ने चिकित्सकले सुझाउँदै आएको पारिवारिक स्रोतले बताएको छ ।

सोहीअनुसार अप्रेसन गर्न चिकित्सकको सुझावअनुसार जेठ १५ गते केएमसी अस्पतालमा कोरोना भाइरस परीक्षण गरिएको थियो । उक्त परीक्षणमा पोजिटिभ आएको स्वास्थ्य मन्त्रालयले मंगलबार पुष्टि गरेको थियो ।

कोरोना संक्रमित गर्भवती महिलालाई बुधबार बिहान घरपरिवारसँग परामर्श गरी ललितपुरको लगनखेलस्थित पाटन अस्पतालमा लगिएको प्रहरी उपरीक्षक प्रधानले जानकारी दिए । 

उनका अनुसार उनको स्वास्थ्य अवस्था सामान्य छ ।संक्रमितको घरपरिवारले उनलाई भक्तपुरको चाँगुनारायण २ दुवाकोटस्थित केएमसीकै अस्पतालमा राखेर उपचार गर्ने व्यवस्था गर्न आग्रह गरेका थिए । 

तर सिनामंगलस्थित केएमसीमै बिरामी तथा चिकित्सक एवं स्वास्थ्यकर्मीमै कोरोना भाइरस संक्रमण देखिएपछि अस्पताल अनिश्चितकालका लागि बन्द गरिएको छ । 

जसले गर्दा दुवाकोटमा उनको उपचार हुन सकेन । अस्पतालले दुवाकोटमा आइसोलेसन वार्डको व्यवस्था भने गरेको छ ।मंगलबार कोरोना भाइरस संक्रमण पुष्टि भएकी ३० वर्षीया गर्भवती महिला भक्तपुरका पाँचौं संक्रमित हुन् ।

यसअघि सुनसरीको झुम्का नगरपालिका घर भई ललितपुरस्थित आरोग्य प्रतिष्ठानमा काम गर्ने २५ वर्षीया महिला, रामेछाप घर भई हाल चाँगुनारायण नपा १ सरस्वतीखेल बस्ने सशस्त्र प्रहरीका २७ वर्षीय जवान, भक्तपुर नपा ५ योसिंखेल बस्ने काठमाडौं महानगरपालिकाको सफाइ गाडीका चालक ४२ वर्षीय पुरुष र भक्तपुर नपा ९ तुमचो निवासी ४२ वर्षीया महिला जनप्रतिनिधिमा कोरोना भाइरस संक्रमण पुष्टि भएको थियो । उनीहरु चारैजना कोरोना भाइरसलाई जितेर डिस्चार्ज समेत भइसकेका छन् ।