काठमाडौं : जुवा खेल्दाखेल्दै पक्राउ परेका प्रतिष्ठित व्यापारिक घरानाका आठ जनामाथि प्रहरीले अनुसन्धान गरेर फाइल जिल्ला सरकारी वकिल कार्यालय काठमाडौंमा बुझाएको छ।
बिहीबार प्रहरीले अनुसन्धानको फाइल सरकारी वकिल कार्यालय बुझाएको हो। पक्राउ परेका आठविरुद्ध प्रहरीले मुुलुकी अपराध संहिताको दफा एक सय २५ को उपदफा ‘एक’ को ‘क’ अनुसारको काबारहीको मागदाबी गरेको छ।
गत सोमबार राति महानगरीय प्रहरी वृत्त दरबारमार्गले कमलादीस्थित रिजेन्सी बुटिक होटल बाई गंगोरबाट व्यापारी नन्दकिशोर शर्मा, अशोककुमार अग्रवाल, गोविन्दराम सरिया, पुरुषोत्तम अग्रवाल, सुरेश अग्रवाल, रामचन्द्र संघाई, विमल अहुजा र विमलकुमार खेतानलाई पक्राउ गरेको थियो।
वृत्तका डीएसपी रञ्जनकुमार दाहालको नेतृत्वमा गएको टोलीले उनीहरुलाई रंगेहात पक्राउ गरेको हो। होटलको आवरणमा जुवा खेलाउने कोलकाताका निक्की जोगाई समेत प्रहरी नियन्त्रणमा छन्। पक्राउ परेका सबै उच्च घरानाका हुन्।
महानगरीय प्रहरी परिसर टेकुका प्रमुख प्रहरी वरिष्ठ उपरीक्षक (एसएसपी) श्यामलाल ज्ञवालीले व्यावसायिक रुपमा जुवा खेलाउने गरेको विशेष सूचनाका आधारमा छापा मार्दा आठ जुवाडेसहित होटल सञ्चालक पक्राउ गरिएको थियो। उनीलाई दरबारमार्ग वृत्तको हिरासतमा राखेर प्रहरीले अनुसन्धान गरिरहेको छ।
पक्राउ मध्ये अशोककुमार अग्रवाल गिनीका अवैतनिक वाणिज्य दूत हुन्। उनी विशाल ग्रुपका संचालकसमेत हुन्। यस्तै, रामचन्द्र संघाई त्रिवेणी ग्रुपका संचालक र एनआईसी एशिया बैंकका निर्देशकसमेत हुन्। छापा मार्न पुगेको प्रहरीले होटलमा जुवा खेलिरहेका व्यापारीबाट ५० रुपैंयादेखि एक हजारसम्मका एक सय ७९ वटा चिप्स र दुई लाख ७७ हजार नगद बरामद गरेको थियो। बरामद चिप्स क्यासिनोमा जुवा खेलाउनका लागि प्रयोग गर्ने चिप्स हुन्। यी चिप्सको यथार्थ भन्दा बढी मूल्य हुने आशंका प्रहरीले गरेको छ। व्यापारी संघाइलाई सरकारले गत वर्ष विभूषित समेत गरेको थियो। पक्राउ मध्येकै पुरुषोत्तम घिराइया कपडा व्यापारी हुन् भने गोविन्दराम सरिया चिया उद्यमी हुन्।
दरबारमार्ग वृत्तका प्रमुख डिएसपी रञ्जनकुमार दाहालका अपराध संहितामा उल्लेख भए अनुसार पहिलो पटक जुवा खेल्ने वा खेलाउनेलाई तीन महिनासम्म कैद वा ३० हजार रुपैयाँ जरिवाना तिर्नुपर्ने प्रावधान छ।
प्रतिक्रिया दिनुहोस !
