काभ्रे : काभ्रेमा पाँचजनामा पहिलो पटक कोरोना भाइरस सङ्क्रमण पोजिटिभ देखिएको जिल्ला स्वास्थ्य कार्यालयले जनाएको छ । कोभिड-१९ रोकथाम तथा नियन्त्रण, जिल्ला कमाण्ड पोष्टले जिल्लामा दुईजना महिला र तीनजना पुरुषमा पहिलोपटक कोरोना सङ्क्रमण देखिएको शुक्रबार जनाएको छ ।
जिल्लाको रोशी गाउँपालिकाका तीन, पाँचखाल नगरपालिकाका एक र पनौती नगरपालिकामा एक गरी पाँचजनामा पीसीआर परीक्षण गर्दा कोरोना सङ्क्रमण पुष्टि भएको जिल्ला कमाण्ड पोष्टका सदस्य एवं जिल्ला स्वास्थ्य कार्यालय प्रमुख डा. नरेन्द्र झाले जानकारी दिए ।
सङ्क्रमितमध्ये पाँचखाल नगरपालिकाका एकजना १२ दिन अघिमात्र भारतबाट आएका थिए।उनी पाँचखालमै क्वारेन्टाइनमा बसिरहेको रहेको कमाण्ड पोष्टले जनाएको छ । पनौतीका सङ्क्रमित महिला धुलिखेल अस्पतालमा पित्तथैलीको शल्यक्रिया गर्न आएको र शल्यक्रियाअघि ती महिलाको पीसीआर परीक्षण गर्दा कोरोना भाइरस पोजिटिभ देखिएको पोष्टले जनाएको छ ।
रोशी गाउँपालिकाका तीन सङ्क्रमित मंगलटारमा रहेको भने क्वारेन्टाइनमै रहेको जनाइएको छ । उनीहरु केही दिनअघि मात्र भारतबाट फर्केका थिए । जिल्लामा सङ्क्रमितको स्वास्थ्य सुरक्षामा विशेष निगरानी भइरहेको प्रमुख डा. झाले बताए ।
प्रतिक्रिया दिनुहोस !
