अछाम : भारत तथा जिल्लाबाहिरबाट आएकालाई राख्न स्थानीयतहले सरकारी विद्यालयमा क्वारेन्टाइन बनाएका छन् । मापदण्ड अनुसार यहाँका कुनै पनि स्थानीय तहले क्वारेन्टाइन व्यवस्थापन गर्न सकेका छैनन्। क्वारेन्टाइन अव्यवस्थित भन्द्रगोल छ। त्यसमाथि वर्षा भएपछि क्वारेन्टाइनमा बस्नेलाई थप समस्या हुने गरेको छ ।
सरकारी विद्यालयमा बनाइएका अधिकांश क्वारेन्टाइन लगातारको वर्षाले चुहिन थालेका छन् । साँफेबगर नगरपालिका ९ बुढाकोटको बाल बिकास केन्द्र दुन्नाउलामा बनाइएको क्वारेन्टाइन चुहिन थालेपछि रातभरि जागाराम बस्नु परेको निरन्जन कुँवरले बताए । ‘पानी पर्नासाथ चुहिहाल्छ । रातभर उठेरै बस्नुपर्छ, झ्याल ढोका केहि छैन, राती सुत्न पनी डर लाग्छ। चर्पी छैन बाहिर दिशा पिसाब गर्दा गाउँलेले गाली गर्छन्', उनले भने, 'खानेपानीसमेत छैन । हेर्न पनि कोही आउँदैनन् । गाईगोरुको अवस्था जस्तै भएको छ ।’
अहिले उक्त क्वारेन्टाइनमा ६ जना बसिरहेका छन् । पानी परेपछि भलसमेत भित्रै पस्ने गरेको पार्वतीदेवी परियारले बताइन् । उनी १४ दिन पहिले भारतको महाराष्ट्रबाट श्रीमानसँगै गाउँ फर्केकी हुन् । उनले भनिन्, ‘उज्यालोको व्यवस्था छैन। राती सुत्ने अवस्था नै छैन। बाहिर निस्कन पाइँदैन, पानीसमेत दिने कोही छैनन् ।’ पुरुषहरु त जता गएर पनि दिशापिशाब गर्ने तर महिलालाई समस्या भएको उनले बताइन् ।
‘क्वारेन्टाइन हो कि यातनाखाना ?', स्थानीय उमेश कुँवरले भने, 'क्वारेन्टाइनमा बस्ने मानौं ठूलै अपराध गरेर आएका हुन् जस्तो लाग्छ । क्वारेन्टाइनमा बसेकालाई तत्काल मनोपरामर्शको आवश्यकता छ तर कसले सुनिदिने यस्ता कुरा? क्वारेन्टाइनमा बसेकाको अवस्था कस्तो छ भनेर हेर्नसमेत कोही जाँदैनन् ।’
कोरोना भाइरसको परीक्षण नहुँदा क्वारेन्टाइनमा बसेको अवधि पूरा हुँदासमेत घर जना नपाएको सुरेश कुँवरले बताए । साँफेबगर नगरपालिकाले हालसम्म कोरोना रोकथाम नियन्त्रण तथा व्यवस्थापनमा करिब ६९ लाख खर्च भएको जनाएको छ । क्वारेन्टाइन व्यवस्थापन,राहत वितरण,स्वास्थ सामाग्री खरिद तथा आइसोलेन निमार्णमा करिब ६९ लाख खर्च भएको साँफेबगर नगरपालिका प्रमुख कुलबहादुर कुँवरले बताए ।
भारतबाट आउनेको संख्या बढ्न थालेपछि बनाइएका क्वारेन्टाइन अपुग हुन थालेका छन् । जिल्लामा हालसम्म ६ हजारभन्दा बढी क्वारेन्टाइनमा रहेका छन् । जिल्लामा १३ जनामा कोरोना संक्रमणको पुष्टी भएको छ ।
प्रतिक्रिया दिनुहोस !
